2017-imut aningaasanut inatsit Naalakkersuisoqatigiit nutaat 145 millionit koruuninik amigartooruteqarnissaq siunnerfigigaat

Namminersulernermut sulissoteqartoqarnerani aningaasaqarnikkut imminut napatissinnaaanermut angusaqarniarneq kinguartinneqarpasippoq.

Aningaasaqarnermut akileraartarnermullu ataatsimiititaliaq aningaasanut inatsisip pingajussaarneqarnissaanut isumaliutissiissummi taama naliliivoq. Naalakkersuisut nutaat allannguutissatut siunnersuutaasa 175-it aningaasaqarneq ukiut sisamat ingerlanerini 144 millionit koruuninik ajornerulersippaat.

- Allannguutissatut siunnersuutit saqqummiunneqartut naapertorlugit attassisinnaanissamik pilersaarutit aammalu aningaasaqarnikkut imminut napatittumik ingerlajartuaarnissaq maannamut kinguartikkallarneqartutut isikkoqarput, aningaasaqarnermut akileraartarnermullu ataatsimiititaliaq aningaasanut inatsisissatut siunnersuutip ataasinngorpat pingajussaarneqarnissaanut isumaliutissiissummi taama allappoq.

AAMMA ATUARUK Kissaatit nutaat

2017-imi 21,7 millionit koruuninik sinneqartoornissaq missingersuutigineqarpoq, ukiulli sisamat ingerlanerini isertitat anigaasartuutillu oqimaaqatigiinnissaannut piumasaq aningaasaqarnikkut imminut napatissinnaanermut pingaaruteqartoq ataatsimiititaliap nalilersorpaa.

Aningaasanut inatsisissatut siunnersuut aappassaaneernerqarmat allatut isikkoqarpoq. Tassani 1 millioni koruuninik ukiut sisamat ingerlanerini amigartooruteqarnissaq siunnerfigineqarpoq. Allannguutissatut siunnersuutit kingorna 144,9 millionit koruuninik amigartooruteqarnissaq maanna tassa siunnerfigineqarpoq.

Taamaattoq aningaasaqarnermut akileraartarnermullu ataatsimiititaliamit naalakkersuisuutitaqartunit Inuit Ataqatigiinnit Siumumiillu ilaasortaaffigineqarnerusumit aningaasanut inatsisissatut siunnersuutip akuersissutigineqarnissaa inassutigineqarpoq.

AAMMA ATUARUK Nunatta karsia millionerpassuarnik iluanaaruteqarnerusoq

Naalakkersuisullu aningaasanut inatsisissatut siunnersuutaat maanna saqqummiunneqartoq partiinit naalakkersuisuutitaqartunit ataatsimiititaliamiittunit taperserneqartoq, Jens Immanuelsenip KNR-imut uppernarsarpaa.

Siunnersuutit aningaasalerneqanngitsut aningaasanut inatsisissatut siunnersuutip allannguuteqarneranut pissutaanerpaapput. Ilaatigut namminersornermut naalakkersuisoqarfiup pilersitsisoqarneranut, tunngaviusumik inatsisissamut isumalioqatigiissitassap allattoqarfissaanik pilersitsinissamut, Dronning Ingridip napparsimavissuani meeqqanut immikkoortortamik arfineq pingasunik siniffilimmik pilersitsinissamut, kiffartuussinissamik isumaqatigiissutinut nutaanut ilassutitut isumaqatigiissusiornissamut ilaatigut immikkoortitsisoqassaaq.

Namminersorlutik Oqartussat Qaasuitsup Kommuniata avinneqarnissaanut aamma akileeqataasussaassapput.

Demokraatit aningaasanut inatsisissatut siunnersuummut tapersiinngillat.

- Demokraatini annilaarutigaarput amerlanerussuteqartut socialistiskiusut aamma naalakkersuisoqatigiit socialistiskiusut aningaasanik atuisinnaanerat. Aningaasanik piginngisatsinnik. Tassunga ilanngutissavarput naalakkersuisoqatigiit anguniarmassuk Kalaallit Nunaata namminersulivinnissaa. Ataqatigiinngillat, Demokraatit ataatsimiititaliami ilaasortaatitaat, Randi Vestergaard Evaldsen tusagassiuutinut nalunaarummi allappoq.

AAMMA ATUARUK Naalakkersuisut kommunip avinnissaa akilissagaat