2017-imut aningaasanut inatsit: Kissaatit nutaat
Aningaasanut inatsisissatut siunnersuutip saqqummiunneqaqqaartup 33 millionit koruuninik sinneqartoorfiunissaa missingersorneqarpoq. Maannali allanngortoqangaatsiarnikuuvoq.
Naalakkersuisoqatigiit siuliisa allannguutissatut siunnersuutaasa hunnorujoqqissaat kingorna 2017-imut 57,8 millionit koruuninik sinneqartoornissaq aappaagumut missingersuutigineqarpoq.
Ataatsimut katikkaanni aningaasanut inatsit ukiuni sisamani 1 millioni koruuniinik amigartooruteqarfiusussaq maanna siunnersuutaavoq.
Taama siunniussipput, naak ukiormanna aningaasanik inatsit ilimaginngisaagaluartunik 55 millionit koruuninik isertitaqaateqarnerugaluartoq.
Aningaasanullu inatsisissatut siunnersuutip aappassaaneerneqarnera pingajussaaneerneqarnissaanut piareersaatitupajaaq ingerlanneqarpoq. Maannami Naalakkersuisut siulii aningaasanut inatsisissatut siunnersuuutip aappassaaneerneqarnissaanut pingaarnertut piareersaapput.
Aningaasartuutissat sipaarutaasussanit erseqqinnerusut
Naalakkersuisoqatigiit aningaasanut inatsisitigut aningaasaliiffigisassatut kissaataat suunersut oqallinnermi ilaatigut saqqummiunneqarput.
Naalakkersuisut allanngornerannut aningaasartuutissat pingajussaaneerinissamut ilaatigut ilanngunneqassapput. Namminersornermut naalakkersuisoqarfimmut, naalakkersuisoqatigiit allanngorneranni pilersinneqartumut, aningaasartuutissat aningaasanut inatsisissatut siunnersuummut ilanngunneqarumaartut aningaasaqarnermut naalakkersuisup Aqqaluaq B. Egedep saqquumiinermini oqatigaa. Aamma isumaginninnermut naalakkersuisoqarfiup ataani isumaginninnermut aqutsisoqarfimmik pilersitsinissamut immikkoortitsisoqassaaq.
Aamma atuaruk Kviesgaard: Isertitaqarnermit aningaasartuuteqarnerussapput
Aamma atuaruk Aqutsineq sukannersoq ikinnerusunik sinneqartooruteqarfiusoq
Aamma sipaaruteqartoqarniarpoq. Nioqqutissanik sullissinernillu pisiortornermi sipaaruteqarnissaq, Naalakkersuisut kissaatigaat.
Taakkuli 2017-imut aningaasanut inatsimmut iluanaarutaanavianngillat, 2020-mili 15 millionit koruuninik sipaaruteqartoqarumaartoq naatsorsorneqarpoq.
Piitap kissaatai
Inuit Ataqatigiit kissaataasa ilaat
5 mio. kr. (ukiumut) Meeqqat inuusuttullu isumaginninnikkut nuna tamakkerlugu
pilersaarusiornissaq timitalersuinissarlu – ukiut sisamat ingerlanerini katillugit 20 mio. kr.
2 mio. kr. (ukiumut) MIO paasissutissanik katersinissaannut angalanissamut iliuusissanullu tapiissutit –ukiut sisamat ingerlanerini katillugit 8 mio. kr.
3 mio. kr. (ukiumut) Nunaqarfinni inuussutissarsiornikkut nukissiuuteqarnikkullu
siuarsaaneq ukiut sisamat ingerlanerini katillugit 12 mio. kr.
Selskabsskatip appartinneqarnissaa imaaliallaannaq akuersaarsinnaanngilarput.
Meeqqat atuarfiat
Ukiuni tulliuttuni sisamani Meeqqat atuarfiini atuartitaanermut pitsanngorsaanissamut aningaasaliinissaq, minnerpaamik 10 mio. kr.-nik kissaatigaarput, ilaatigut forældreråd pilersinniagaq ukiumut 2 mio. kr.-nik atuiffigineqannginnissaa siunnersuutigalutigu.
Ukiuni tulliuttuni sisamani 20 mio. kr, Meeqqat atuarfiisa aserfallatsaalineqarnerinut
aningaasaliinissaq, sanaartornermut aningaasaateqarfimmit immikkut meeqqat
atuarfiinut aningaasaliinikkut.
Kiffartuussinissamut isumaqatigiissummut kissaatit
1. Helistop, heliport
2..Mittarfeqarfiit sulisoqartitsinissamik pisussaaffilerlugit
3. Mittarfeeqqanik sanaartornissaq: Disko aamma Kujalleq
4.Peqqinnissaqarfiup eqqugaannginnissaa (pitsorluttut majuartarfeqarnissaat)
5.Saaffiginniffissaq ataaseq
6.Isumaqatigiissut killilik
7.Isumannaallisaanermut piumasaqaatit (AirGreenland-ip ukiorpassuarni inerisarnikuusaattut qaffasitsigisumik) / klausuleqartitsineq
Najoqqutarisaq: Inuit Ataqatigiit oqaaseqaataat
Inuit Ataqatigiit taaseqataassagunik pimasarisimasaat partiip naalakkersuisuutitaqartup oqaaseqartartuata Peter Olsenip saqqummiuppai.
Inuit Ataqatigiillu kissaatigisimasaat amerlapput.
Ilaatigut meeqqanut inuusuttunullu isumaginninnikkut pilersaarusiornissamut ukiumut 5 millionit koruunit, nunaqarfinni inuussutissarsiornikkut nukissiuuteqarnikkullu siuarsaanissamut ukiumut 3 millionit koruunit immikkoortinneqarnissaat Inuit Ataqatigiit kissaatigisimavaat.
Aamma atuaruk Ullunut ajornernut ileqqaarisa
Aamma atuaruk IA: Siunnersuutigut siunissamut aningaasaliinerupput
Aningaasanut inatsisissatut siunnersuutip, aappassaaneerneqarnerani saqqummiunneqartup Demokraatit akueriniaraat, aningaasaqarnermut naalakkersuisuusimasup, Randi Vestergaard Evaldsenip oqaatigaa. Siunnersuulli pingajussaarneqarnissaanut allannguutissatut siunnersuutinut nakkutiginneqqissaarniarluni ilanngullugu oqaatigaa.
Siumut aamma kissaateqarpoq. Kangaatsiami meeqqat atuarfianni oquk peerneqarnissaanut oqaatsittalu nutserneqarnissaannut qarasaasiatigut nutserummut 2 millionit koruuninik immikkoortitsisoqarnissaa, Siumup oqaaseqartartuata Jens Immanuelsenip saqqummiinermini oqaatigaa.
Namminersornermut naalakkersuisoqarfimmut qanoq aningaasaliitogisoqarnissaa Siumup qanoq isumaqarfigineraa, Randi Vestergaard Evaldsenip apeqqutigaa.
Tamannali Jens Immanuelsenip suli akisinnaanngilaa.
- Ataatsimoorussamik anguniagaqarnerput nuannaarutigaara, qanorli aningaasaliitigisoqassanersoq pillugu partiit assigiinngitsunik isumaqarput, Immanuelsen oqarpoq.