IA: Siunnersuutigut siunissamut aningaasaliinerupput
Aappaagumut aningaasanut inatsisissatut siunnersuummi 33 millionit koruuninik sinneqartoornissaq naatsorsuutigineqarpoq, taamaattorli aningaanaqarnermut naalakkersuisup Randi Vestergaard Evaldsenip erseqqissarpaa Nunatta aningaasaqarnerani aaqqissuusseqqinnissaq avaqqunneqarsinnaanngitsoq.
Ullumilu marlunngornermi aningaasanut inatsisissatut siunnersuutip Inatsisartuni siullermeerneqarnissaanut atatillugu Inatsisartuni ilaasortat akisussaaffimmik tiguseqqullugit qinnuigai.
- Piffissaq ungasinnerusoq isigalugu aningaasaqarnikkut attassisinnaanerup aamma pitsaasumik aningasaqarnerup oqimaaqatigiissinissaata qulakkeernissai Naalakkersuisut kisimik suliassarinngilaat. Akisussaaffiuvoq, Inatsisartuni Naalakkersuisunilu ilaasortanut tamanut pisussaaffiusoq, Randi Vestergaard Evaldsen allappoq.
Taassuma aamma siunnersuuteqartut siunnersuutitik qanoq aningaasalersorneqarsinnaanerinik tikkuussisaqqullugit qinnuigai.
Illuatungiliuttuni partiit annersaat, Inuit Ataqatigiit, ukiaanerani ataatsimiinnermut 32 siunnersuuteqarpoq – ilaatigut eqqumiitsulianik katersugaasiveqalernissaq siunnersuutigaat. Angallannermut kiffartuussinissamut isumaqatigiissummut aningaasaliissutit amerlineqarnissaannik Aqqaluaq B. Egede aamma siunnersuuteqarluni. Partiilli siunnersuutiminut assigiinngitsunut aningaasartuutissat qanoq pissarsiarineqassanersut tamanut oqaatiginianngilaa.
- Siunnersuutit aningaasanik malitseqartussat tassaapput siunissamut aningaasaliinerit avaqqunneqarsinnaanngitsut, soorlu meeqqat inuusuttullu isumagineqartariaqartut ineriartornermilu ilaatilerlugit, Aqqaluaq B. Egede KNR-imut oqarpoq, oqaatiginaguli aningaasartuutissat qanoq pissarsiarineqassanersut.