Naalakkersuisoq: Piffissaq eqqorlugu isummertoqarsimannginnera ajuusaarnarpoq

Partiit illuatungiliuttut partiilu Naalakkersuisunut tapertaasoq tuttunik umimmannillu tammajuitsussarsiniarluni piniariartitsiffiusartoq, Naalakkersuisut kalerreeqqaaratik kinguartitsinerat isornartorsiungaatsiarpaat.

- Tupaallaatigivarput, Demokraatit siulittaasuat Jens Frederik Nielsen taama oqarpoq.

- Ullormiit ullormut allanngoriataartoqarnera akuerineqarsinnaanngilaq, Siumup siulittaasua Erik Jensen taama oqarpoq.

- Aningaasarsiorfinnik nutaanillu eqqartuineq atorneqartuartoq, paasiuminaatseqaara sooq taamannak ulluinnarlugu matusinerat, Aqqalu Jerimiassen taama oqarpoq.

Taanna Naalakkersuisunut ikorfartortitut partiip Atassutip siulittaasoraat.

AAMMA ATUARUK Demokraatit Atassullu: Umiarsuarnit takornariartaatineersunit isertitassaraluit aningaasarpassuit annaavaagut

Amerikamiut nunatsinnukarlutik tammajuitsussarsiniarlutik piniariarlutik tikereeraluarlutik piniariarnatillu utiinnartariaqarmasut, takornariartitsisartut North Safari Travel aamma Trophy Hunting Greenlandip tusagassiuutinut oqaluttuaraat.

Tusarniaaneq sivikippallaartoq

Tammajuitsissarsiniarluni piniariartitsinissamut pisassiittutit pillugit Naalakkersuisut juunip aallaqqaataaniit juulip aappaata tungaanut tusarniaapput. Piffissaliussaq sivikippallaartoq partiit oqaatigaat. Ikinnerpaamik sapaatit akunneri arfinillit tusarniaasoqartassasoq inatsimmi piumasaqaataavoq.

Takornarialerisullu taarsiiffigineqartariaqartut Demokraatit Atassullu isumaqarput.

- Eqqaamassavarput amerlasuut immaqa qangali akileereerput. Aningaasallu taakku inerisaanissamut taavalu piniariartitsinissamut piareersarnermut atorneqareerput, taamaammat naalakkersuisut taarsiivigisariaqarpaat soorunami, Jens Frederik Nielsen oqarpoq, malitsigisaanilu Aqqalu Jeremiassen ima oqarluni.

- Akiliutigineqarsimasut isumaqarpunga utertittariaraluaraalluunniit, Atassummi siulittaasoq oqarpoq.

Naalakkersuisoqarfimmiit ilimasaarutigineqarsimagaluarpoq takornarialerisunut pisassuutit allanngortinneqassanngitsut.

 - Ilimasaarneqareersimapput umimmattassiissutigineqartussat aammalu periutsit tamarmik allanngortinnginnissaanik siunertaqartoqartoq. Taamaattorli atuutilertinneqartoq allarluinnaalluni, Erik Jensen oqarpoq.

Nunaqavissut kissaataat malillugu Qeqqata Kommunia tusarniummut akissuteqarsimanera pillugu tammajuitsussarsiorluni piniartitsisarnerit Naalakkesuisunit unitsinneqartoq piniarnermut naalakkersuisoq sisamanngormat oqarpoq.

- Taava soorunami akisussaaffik Naalakkersuisup tigullugu aaqqinneqarnissaanik suliaqartariaqarpoq. Oqaannarani ukuuku taamaammata taamaattunga, Erik Jensen oqarpoq.

Naalakkersuisut akissutaat

Sisimiut eqqaanni tammajuitsussarsiniarluni piniarnissaq aasaq manna juulip aallaqqaataaniit aggustip aallaqqaataanut kinguartinneqarpoq.

Allannguutissatulli siunnersuutit juunip aallaqqaataaniit aatsaat tusarniaassutigineqarput. Inatsisartunulli upernaaq qinersineq peqqutiogalugu siusinnerusukkut tusarniaasoqarsimasinnaangitsoq, piniarnermut naalakkersuisoq, Aqqaluaq B. Egede nassuiaavoq.

- Inatsisartunut qinersisoqarsimanngitsuuppat, tusarniaanermut ulluliussat eqquutinneqarsimassagaluarput. Qinersinerli tusarniaanissamik kinguartitsivoq, Aqqaluaq B. Egede oqarpoq.

Sisimuiut eqqaanni tammajutsissarsiornut piffisssaliussap juulip aallaqqaataaniit aggustip allaqqaataanut kinguartinnerarut, Qeqqata Kommuniata kissaatai Naalakkersusisut tusaaniarsimagaat, naalakkersuisoq oqarpoq.

Nalakkersuisup inuussutissarsiortut isornatorsiutaat paasivai, isummaninnilli saqqummiussinissamut piffissaqarsimasut oqarluni.

- Piffissaq eqqorlugu isummertoqarsimannginnera ajuusaarnarpoq, Aqqaluaq B. Egede KNR-imut oqarpoq.