Naalakkersuisoq oqaatsit pillugit oqallinnissamut ammatitsisoq: - Parnaaqqanngilagut

Meeqqanut, Inuusuttunut, Ilinniartitaanermullu naalakkersuisup, Nivi Olsenip (D) atuarfeqarnermik aaqqissuusseqqinnissaq politikerit akornanni oqaluuserineqarnissaa attappaa, aamma naak IA kinguartitserusukkaluartoq.

Allattoq Jørgen Semionsen, Ann-Sophie Greve Møller

februaarip 24-at 2026 13:49

Nutserisoq Connie Fontain

Meeqqanut, Inuusuttunut, Ilinniartitaanermullu naalakkersuisup, Nivi Olsenip (D) atuarfeqarnermut aaqqissuusseqqinnissap, oqallisaaqisup Inatsisartuni upernaakkut ataatsimiinnermi oqaluuserineqarnissaa attappaa.

Taassuma tamanna Inuit Ataqatigiit Inatsisartuni gruppiata oqallinnissamik kinguartitsisoqarnissaanik sapaatip akunnerata siuliani kaammattuuteqarnerata kingorna KNR-imit apersorneqarnermini oqaatigaa. Inatsisartut gruppiannili ilaasortap naalakkersuisut meeqqat atuarfiinik allannguerujussuarnissaata iluaqutissartaasa ajoqutissartaasalu misissorneqarnissaanut piffissamik atuisoqartariaqarsoraa.

Nivi Olsenilli partiip naalakkersuisoqataasup oqallinnissamik kinguartitserusunnera eqqarsarnartoqartippaa.

- Tamanna tupaallannalaarpoq, taanna oqarpoq, nangillunilu:

- Isumaqarpunga ilinniartitsisut kattuffiat tusarniaaffigilluareerlugu aammalu ilisimatusartut ilinniartitaanermut aallaaveqartumik tusarniaaffigilluareerlugit oqaatsinillu oqaasileriffik tusarniareerlugu uggorivara kinguarsarneqassappat.

Tuluttut siuariartortoq

IA naapertorlugu oqallittoqannginnerani Ilinniartitaanermut Siunnersuisoqatigiit ilanngutitinneqarnissaat pingaaruteqarpoq. Atuarfinnimmi aaqqissuusseqqinnissaq tusarniaassutigineqarmat tamanna assigiinngitsunit isornartorsiorneqarpoq.

Naalakkersuisut atuarfinnik aaqqissuusseqqinnikkut 1. klassimit 4. klassimut fagit 13-init ikilisinniarpaat. Danskisoortarneq 4. klassinngornissaannut kinguartinneqartussanut ilaavoq.

ULLUMIKKUT SIUNISSAMILU ILINNIUTIT

Meeqqat 1. klassimiit 3. klassimut atuartut ilinniutigineqartut kalaallisut, qallunaatut, inuiaqatigiilerineq, oqaluttuarisaaneq, upperisarsiorneq, isumalioqqissaarneq, kisitsineq, pinngortitalerineq, inuttut ineriartorneq, eqqumiitsuliorneq, eqaarsaarneq kiisalu nipilersorneq, assassorneq ilusilersuinerlu ullumikkut aqqusaartarpaat. Nukarliit alloriarfianni atuartitsissutit tallimanut ikilisinneqarnissaat Naalakkersuisut siunnersuutigaat.
Inatsisissatut siunnersuut naapertorlugu ilinniutit tallimat tassaassapput: kalaallisut, kisitsineq, timersorneq silamilu sammisaqarneq, eqqumiitsuliorneq soorlu nipilersorneq, isiginnaartitsineq, illuliortaaseq aamma inuunermi piginnaasat.
Inuunermi piginnaasat ilinniutaavoq nutaaq, taannalu inatsisissatut siunnersuummi ilisaritinneqarpoq, nalerisimaarnermut akiuussinnaanermullu tunngasuulluni. Tamanna inuttut ineriartornermut taarsiutaassaaq. Ilinniutip imarisai imminut naleqartinnermut, isumakkut peqqissuunermut, akiuussinnaanermut, ataatsimoornermut kinaassutsimillu ineriartortitsinermut allanngortinneqassapput.

Allisiguk

Taarsiullugu meeqqat kalaallisut oqaasii nukittorsarneqassasut, Nivi Olsen nassuiaavoq. Naalakkersuisup oqarnera naapertorlugu meeqqat inuusuttullu akornanni tuluttut oqalunneq ullumikkut nalinginnaaneruvoq.

- Meerartagut imminnut tuluttut oqaluutileqqapput, meeqqat nunatsinni tunngaviusumik oqaasii qulakkiivillugit qulakkiinngikkutsigit, kalaallisut oqaatsit politikkikkut iliuuseqarfiginngikkutsigit nukittuneruleraluttuinnartussaapput tuluit oqaasii.

- Meeqqat tuluit oqaasii aammalu danskit oqaasii annertoorujussuarmik ulluinnarminni ullut tamaasa tusaallugillu isigigamikkit kalaallit oqaasii pitsaassusilimmik naqissuserlugu ilinniarneqarnissaat qulakkiissavarput, taanna oqarpoq.

Aaqqiissutissanut ammatitsisoq

Nukarlerni atuartunut danskisut atuartitsisarunnaarnissamut siunnersuut innuttaasut akornanni oqallisigineqangaatsialerpoq. Københavns Universitetimi Kalaallit Nunaat Issittorlu pillugit ilisimatusarfimmi lektoriullunilu Ilisimatusarfimmi Oqaatsinik ilisimatusarfimmi aqutsisoq, oqaatsit pillugit ilisimatusartoq, Naja Blytmann Trondhjem allannguinissamut akerliusut ilagaat.

- Allamiut oqaasiinik peersineq ajortumik kinguneqarsinnaavoq, oqaatsitigummi ineriartorneq kinguariartinneqassaaq. Ilisimatusarnerup oqaatsinik ilinnialiaaraanni oqaatsinik marlunnik arlalinnilluunniit atuilernissamut pikkorinnerulertoqartartoq takutippaa, taanna KNR-imit ataasinngornermi apersorneqarami oqarpoq.

Aamma atuarukIA-p atuarfeqarnermik aaqqissuusseqqinnerup nutaap misissoqqissaarneqarnissaa kajumissaarutigigaa

Naallu Nivi Olsenip meeqqat atuarfiini nukarlerni taamaallaat kalaallisoortoqartarnissaa aalajangiusimagaluarlugu taassuma allamiut oqaasiinik peersilluinnannginnissaq ammatippaa.

- Taamaakkaluartoq tusarniaanerni tusarnaaqqissaarnikuuakka, suna qanorlu naaperiaanertut ittut pisinnaanersut, ilaatigut tuluit oqaasii, danskillu oqaasii piivinnagit 1. klassiminngaanniit aallartittumik pinnguarnerusutut tiguneqarsinnaasut. Una oqaatigilara parnaaqqannginnatta siusinnerusukkut pinnguarninngorlugu oqaatsinik soqutiginarsaaneq allanik ikkussissalluta ammaffigivarput.

- Kisianni una uanni allanngunngilaq: meeqqat fag-ii 13-it amerlavallaarujussuarput, Nivi Olsen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.