Tusagassiuut: Islandimiut EU-mut ilaasortanngornissaq aggustimi taasissutigisinnaagaat

Islandip EU-mut ilaasortanngorniarluni isumaqatigiinniarnerit aallarteqqinnissaat pillugu innuttaasunik aggustimi taasititsinissaq eqqarsaatigaa.

Tusagassiivik Politico taama allappoq, paasissutissiisullu kinaassutsiminnik isertuussisut marluk nunap pilersaarutaanik ilisimasallit innersuussissutigalugit.

Islandimi inatsisartut sapaatip-akunneri tulliuttut ingerlaneranni nalunaaruteqarnissaat naatsorsuutigineqarpoq.

Islandimi naalakkersuisut innuttaasut taasisitsinissaat kingusinnerpaamik 2027-mi anguniagaraat, anguniagaalli USA-p akitsuuteqartitsilernerunerata Kalaallit Nunaannillu tiguaaniarnerup kingorna, maanna siuartinneqarsimagunarpoq.

Island EU-mut 2009-mi ilaasortanngorniarluni qinnuteqarpoq, ilaasortanngornissamullu isumaqatigiinniarnerit 2010-mi aallartillugit.

Islandimili naalakkersuisut 2013-imi  kissaateqareersullu suliaq unitsinneqarpoq.

Aalisarnermut politikki oqallisigineqartoq

Islandimiut angerlutik taasippata, nunat allat EU-mut ilaasortanngorniartut akornanni Island EU-mut ilaasortanngoqqaarsinnaassasoq, paasissutissiisoq kinaassutsiminik isertuussisoq Politicomut oqarpoq.

Reykjavikip Bruxellesillu akornanni piffissami kingullermi tikeraartoqaqattaaginnavissimavoq.

Islandimi ministeriunerup, socialdemokratineersup Kristrún Frostadóttirip, Bruxelles januaarimi tikeraarpaa, EU-p ataatsimiititaliarsuata siulittaasua, Ursula von der Leyen, EU-p Islandillu suleqatigiinnerat pillugu tassani ilaatigut oqaloqatigaa. 

Islandip EU-mut ilaasortanngorniarneq  aningaasatigut 2008-mi ajornartorsiortoqareersoq aallartimmagu, naalakkersuisut saamerliit qiterlermeersullu naalakkersuineranni taama pisoqarpoq.

Naalakkersuisulli nutaat EU-mik qularutiginninnerusut naalakkersuisunngorput, ilaasortanngorniarnerlu unitsikkallarlugu.

Aalisarnermut politikki EU-p Islandillu akornanni oqallisaajuarpoq.

/ritzau/