Nuummiut Amerikamiut aqqartartuat pillugu aatsangaannalertutut pissuseqartut: - Sunaaffa taamak qanitsigisimavoq
Nuup avatinnguani 7 sømilisut avasitsigisumi, qaqutigoortumik arfininngornermi ualikkut pisoqarpoq. Aqqartartumi inuttat ilaat piaartumik napparsimmaveqarfimmi nakorsartittariaqalermat, Issittumi Sakkutooqarfiup aagasuarmagu, Amerikamiut aqqartartorujussuat puttallarpoq.
Umiarsuarsuup alapernaarsuutip Vædderenip suliakkiineratigut, Illersornissaqarfiup qulimiguua Seahawk atorlugu annaassiniartoqarpoq.
Tamanna innuttaasunik arlalinnik tupigusutsitsivoq.
- Tupaallaatigisorujussuuara, Kuulumaat Fleischer KNR-ip Nuuk Centerimi naapitaa oqarpoq.
- Sunaaffa aqqartartoqarsinnaasimavoq taamak qanitsigisumi 7 sømilip iluani. Naatsorsuutiginngilara taama qanitsigilerami pisortanut nalunaaruteqarsimanissaa, taanna oqarpoq.
Eqqarsaammertitsisoq
Suliaq naalakkersuisooqataannit Siumumit politikikkut aamma sammineqarpoq, taakku Naalakkersuisunut arlalinnik allakkat ammasutigut ataasinngornermi apeqquteqarput.
- Tassami aqqartartoq taanna kisimiippa imaluunniit arlariiuppat kiisalu sunik imaqarpa sunalu siunertaralugu nunatta sineriaani angalava? Tusagassiuutinut nalunaarummi apeqquteqartoqarpoq.
KNR-i Issittumi Sakkutooqarfimmut attaveqarpoq, allanilli ilanngussassaqarnatik akissuteqarput.
- Inuttap aagasuarneqarnera Amerikamiut oqartussaqarfii qanimut suleqatigalugit pivoq. Illersornissaqarfiup naalagaaffiit allat iliuusaat pillugit oqaaseqaateqarneq ajorpoq, Issittumi Sakkutooqarfik allappoq.
Nuuk Centerimi arlaliupput Siumukkormiusulli akissutiserusuttut.
- Tupannartoqarpoq. Kisianni allaqqunneqarsinnaanngillat Kalaallit Nunaanni sillimaniarneq pillugu, Anda Egede oqarpoq.
Bent Lundblad pisiniarfissuarmi aamma pisiniartoq assinganik qisuariarpoq.
- Tusarlugu assorsuaq eqqarsaammernarpoq, taanna oqarpoq.
KNR-ip suliaq pillugu Naalakkersuisut siulittaasuat Jens-Frederik Nielsen (D) apersorniarlugu pissarsiariniarsaraat.
