Naalakkersuisoq aalajangersumik oqarpoq: Sikkilinik innaallagiatortut akuerisaapput

Sikkilit innaalliatortut nunatsinni atugaanerannut atatillugu uteqattaartoqalaarnikuuvoq.

Siullermik inerteqqutaapput, akuerisaalersinnaanersullu misissorneqarput, maannalu kiisami akuerisaalerlutik.

Ineqarnermut Attaveqaasersuutinullu Naalakkersuisoqarfik ullumi siusinnerusukkut tusagassiuutinut nalunaarummi allappoq.

Sikkilit akuerisaalernissaannut aqqusinertigut angallannermut inatsititsinni 1979-imeersumi sikkilit inerteqqutaaffigisaani – juunip aallaqqaataani allannguisoqarpoq.

- Maannakkut cykelip innaallagiatortup atornissaa inatsisitigut akuerisaalermat naammagisimaarnarpoq.

- Cykeli innaallagiatortoq assartuutitut sunniuteqarluarsinnaavoq, pisut ilaanni biilinut taarsiunneqarsinnaalluni, taamatullu takornariartitsinermik inuussutissarsiornermi atorneqarsinnaalluni, naalakkersuisoq, Hans Peter Poulsen (S) tusagassiuutinut nalunaarummi oqarpoq.

Danskit ministeriat sunniuteqartoq

Angallannermut susassaqarfik danskit akisussaaffigimmassuk danskit assartuussinermut ministeriat, Thomas Danielsen inatsimmik allanngueqataavoq, taannalu naammagisimaarluarpoq:

- Kalaallit Nunaanni suleqatiga pitsaasumik qanimullu suleqatigilluarpara. Taamaattumik aamma cykelinut innaallagiatortunut tunngatillugu kalaallit kissaataat malillugu inatsisip allanngortinneqarnissaa pingaartissimavara. Peqatigisaanik suliassaqarfinni allani arlalinni maleruagassat nutarterneqarnissaat pillugu oqaloqatigiinneq ingerlaannarpoq, taanna tusagassiuutinut nalunaarummi oqarpoq.

Akuerisaanissaanut malittarisassaqartoq

Naak sikkilivit innaallagiatortup atornissaanut ilerasuutissaqanngikkaluarlutik sikkilip akuerisaanissaanut arlalinnik suli piumasaqaateqarpoq.

• Cykelinut inaallagiatortunut maleruagassat:
• Cykeli ataasiinnarmik motooreqarsinnaavoq.
• Taamaallaat tukkartortilluni motoori ikiuutissaaq, taamaattoq 6 km/t tikillugu ikiuuteqarsinnaavoq (pisuttutut sukkatigisoq).
• Motoori annerpaamik 750 watt-inik sakkortussuseqassaaq.
• 25 km/t tikillugu motoori taamaallaat ikiuussinnaassaaq.
• Bremsinut, qullernut, atortunullu allanut tunngatillugu nalinginnaasumik sikkilinut malittarisassat atuutissapput.
• Cykelertoq cykelertilluni niaquarnaveeqquteqassaaq

Løbehjulit innaallagiatortut inatsisitigut akuerisaalernissaannut aamma kissaateqartoqarnikuuvoq. Taannali suli akuerineqanngilaq, kisianni ‘kingusinnerusukkut allannguummi ilanngunneqarumaartut’, naalakkersuisoqarfik allappoq.