Kunngikkormiut tikilerput: piareersarnerit aallartereerput
![](/sites/default/files/styles/image_934x467/public/2024-06/20240624-145159-L-1920x1279we.jpg?h=d4f8ffc4&itok=Qm-6o1sD)
Kingullermik ukioq 2004-mi katerlaajullutik Kunngi Frederik aamma Dronning Mary Qaanaamiipput, maannakkullu taamatut angalaqqillutik, ullut arfineq-pingasut nunatta sineriaani ingerlaaqqittussanngorput.
- Kunngissatut taamani tikikkami killitsisimaarpoq, ilimagivara Qaanaamut angerlarsertoq, Jens Danielsen Qaanaami najungaqartoq oqarpoq.
Kunngip immikkuullarissumik illoqarfimmut attuumassuteqalernera 2000-imi pivoq, qaammaterpaalunnimi Siriusimi alapernaarsuisuini najungaqarpoq.
- Taamaattumik maannakkut qanoq qisuariassanersoq pissaganarpoq, nangilluni oqarpoq.
Jens Danielsenip qularutiginngilaa, kunngi frederiup ilisarisimasani illoqarfiullu meerartai takugunigit killitsisimaarumaartoq.
- Tamattalu taamatut misiginissarput ilimanarpoq, Jens Danielsen taama oqarpoq
Ukiut 50-it kingorna tikeraaqqinneqalertut
Qaanaamiinnarlu tikinnissaannut qilanaartoqanngilaq. Nunaqarfimmimi Attumi immikkuullarilluinnartuussaaq.
Nunaqarfik ukiut 50-ingajanni kunngikkormiunit tikinneqarnikuusimanngilaq.
Nunaqarfimmi najungaqartut tamarmik qilanaarput, ilisimaneqareersutullu kunngikkormiut nunatsinni nuannarineqarluartuupput, erseqqaripporlu aamma maani nuannarineqarluartut, nunaqarfimmi aqutsisuni siulittaasoq, Per Ole Frederiksen (S) taama oqarpoq.
Maanimiut nunaqarfimminnut tikeraartoqalermat qilanaarput, eqqumiitsuliamik uleersisoqassaaq kunngikkormiullu takornariartinneqarumaarlutik, Per Ole Frederiksen taama oqarpoq.
Dronning Margrethemiit atoqqaartinneqartoq
Ukiut 50-it matuma siorna dronning Margrethep nunaqarfik tikeraarpaa oqaluffillu atoqqaarfissiortillugu, oqaluffillu kunngikkormiunut juulip aallaqqaataani takutinneqassaaq.
Massa kingusissukkut aputaarussimagaluartoq piareersaatillu kinguaattooqqangaluartut, nunaqarfimmi aqutsisuni siulittaasoq qulaqqusinngilaq piareersaatit piareerumaarmata.
Kunngikkormiut juunip ulluisa 29-anni avannaaniik angalanertik aallartissavaat, angalanerlu Narsami Qassiarsummilu juunip ulluisa arfernanni naggasissavaat.