Canadami arnaq panini nunap inoqqaaviusuusaartillugit peqqusullunnini parnaarussaassutigaa

Nunavummi Nunap inoqqaaviusuusaartoqarsimanera uissuumitsitsivoq.

Karima Manji, panini nunap inoqqaaviusuusaartillugit - tassa inuit, ukiuni pingasuni parnaarussassanngorpoq.

Nutaarsiassaqartitsivik The Guardian taamak allappoq.

Panini Nunap inoqqaaviusuusaartillugit 150 tusindtit canadiske dollars-inik pisortaniit pissarsisimapput. Danskit koruuninngorlugit 760.000-pput.

Tassa salluliortoqarsimasutut Nunavummi eqqartuussisup Mia Manocchiup nalilermagu Karima Manji peqquserluuteqarsimasutut sisamanngormat eqqartuussaavoq.

Eqqartuussinermi pineqaatissiineq sakkortunera innuttaasunut ersersitsissaaq siunissami nunap inoqqaaviusuusaartoqaraangat pineqaatissiineq sakkortussammat, Eqqartuussisoq The Guardian-mut oqarpoq.

Canadami ukiut kingulliit nunap inoqqaaviusuusaarlutik pinerlunnerit arlalippassuit ajornartorsiutigisimavaat, nunap inoqqaaviusaarlutik nunaminertamik pissarserusullutik immaqaluunniit aningaasatigut ikiorsissutinik pissarserusullutik nunap inoqqaaviusuusaartarput.

Karima Manji sisamanngormat eqqartuussaavoq, aningaasat pinerlulluni pissarsiarisimasai amerlanerpaartaat utertereerpaai, aningaasat taarsigassai 65.000 kroner sinnerupput.