USA-mi eqqartuussiviit qullersaata Donald Trump ilaatigut eqqartuunneqarsinnaatinngikkaa
USA-mi præsidentiusimasoq Donald Trump præsidentiunermi nalaani iliuutsiminut ilaatigut eqqartuunneqarsinnaassanngitsoq USA-mi eqqartuussiviit pingaarnersaat ippassaq ataasinngornermi aalajangiivoq.
Nutaarsiassaqartitsivik Reuters taama allaaserisaqarpoq.
Præsidentitut atorfimmut suliat attuumassutillit pillugit præsidentiusimasut eqqartuunneqarsinnaassanngitsut eqqartuussivik aalajangiivoq.
Taamaakkaluartorli inuinnartut iliuutsiminnut eqqartuunneqarsinnaassallutik.
2020-mi qinersinermi inernerusumik allannguiniarsimasutut Donald Trumpip Washington DC-mi unnerluutigineqarneranut suli kinguartitsinerusoqarnissaa ataasinngormat aalajangiinerup malitsigaa.
- Tunngaviusumik inatsimmut tamallu oqartussanerannut ajugaaneruvoq annertooq, Donald Trump Joe Bidenimiit præsidentiussusermik tiguseqqinniarluni unammillertoq Truth Socialimi allappoq.
- Amerikkarmiuunera tulluusimaarutigaara, nangilluni allappoq.
Trumpip eqqartuunneqarsinnaannginneranik eqqartussiviup appasinnerusup itigartitsinera taamaalilluni Amerikami eqqartuussiviit qullersaanni sunniuteqarunnaarsinneqarpoq.
Eqqartuussiviit qullersaanni eqqartuussisut konservativeusut arfinillit ataasinngornermi aalajangiinermi akuersipput. Liberalillu pingasut isumaqatiginninnginnerminnik oqariartuuteqarput.
Nunap ilaani eqqartuussiviit aalajangiissasut
Eqqartuussisut pisortaata John Robertsip nunap ilaani eqqartuussiviup ullumikkut aalajangerneq tunngavigalugu Trumpip iliuusai sorliit eqqartuunneqarsinnaatitaannginneranut ilaassanersut aalajangissavai
Eqqartuussiviit qullersaata aalajangernerani Trumpip inatsiseqarnermullu ministereqarfimmi atorfillit akornanni oqaloqatigiinnerit eqqartuunneqarsinnaanngivinnermut ilaasut aalajangerneqarpoq.
Eqqartuussiviilli appasinnerusut Trump immikkoortuni pingasuni unnerluutigineqassutigisaani eqqartuunneqarsinnaatinneqassannginnersoq maanna aalajangissavaat. Nutaarsiassaqartitsivik Reuters taama allaaserisaqarpoq.