Kunngikkut Nuummut ullumi tikissapput
Kunngi Frederik nulialu dronning Mary marluliaattaallu prinsesse Josephine aamma Prins Vincent nunatsinni pisortatigoortumik angalanerminni Nuummut ullumi tikissapput
Pilersaarutit naapertorlugit kunngikkormiut umiarsuaat Dannebrog Nuup saavanut ullaarmana qulinut tikissaaq, tassanilu kunngikkormiut tikilluaqquneqassallutik.
Ulluni marlunni nuummiinnerminni sumiiffinnut assigiinngitsunut alakkaassapput.
Nuummi Kommuneqarfik Sermersuup allaffeqarfianut aqqanermut qiteqquppat pulaassapput, taava ullup qeqqanut tanneq qulingiluanngorpat atuarfik Inussuk takornariarneqassaq. Pingasunut tanneq qulinngorpat Nuummi mittarfiup illutaanut nutaamut takornariassallutik. Dronning Mary aqagu qulinut meeqqerivimmut nutaamut Naasumut pulaassaaq.
Unnugu nalunaaqutaq arfineq marlunut qiteqquppat Nuummi kulturikkut illorsuarmi Katuami pisortatigoortumik nereqatigittoqassaaq, naalakkersuisut tassani qaaqqusisuullutik. Nereqatigiinnermi tassani KNR TV toqqaannartumik ualeru tallimaniit aallakaatitsilluni aallartissaaq.
Kunngikkut meeraallu nunatsini angalanerminni ippassaq freerput. Kunngikkormiullu nittartagaani assilineqarnersimasut naapertorlugit Kangaamiut timaanni Kangerlussuatsimi angallammik angalaarput, tassani saarullinnik aalisarput pisatillu kunngikkormiut umiarsuaannut Danebrogeliaanneqarlutik.
Kunnngikkormiut Nuummeereerunik aqagu ualikkut kujataanut aallassapput ullunilu tulliuttuni Narsarsuaq Igaliku, Narsaq naggataagullu Qassiarsuk tikeraarneqassallutik.
Kunngikkormiut nunatsinnut tikeraanerat arfininngornermi naggaserneqassaaq.
