Igaffimmi pisortaq kunngikkormiunut nerisitsinissamut: Qaaqqusanut ilaannginnera uggorigingajappara
Ulluinnaqarpoq – nalliuttorsiorfeqarlunilu.
Kunngikkormiullu Nuummut tikinnerat nalliuttorfiussaaq. Taakkumi illoqarfiit pingaarnersaanni Katuami nerersuaqatigiinnissamut qaaqqusat allat 200-it missaanniittut peqatigalugit qaaqquneqarput.
Katuamilu igaffimmi pisortaq, Claus Schmidt kunngikkormiunut aatsaat nerisassiulinngilaq. Taamaakkaluartorli suliassaq pissanganarpoq.
- Tamanna nuannerpoq. Ulluinnatsinniit allaanerusumik suliaqartitsivoq. Danmarkimi maanilu tamanna sisamat tallimariarlunga misigisareerpara. Nuannareqaarali. Suliatsigut unammilligassaqarpugut, qilanaarisatsinnik, taanna oqarpoq
Taanna igaffimmilu suleqatini qulit nunatsinneersunik nerisassiorput.
Nunatsinni aalisagaarrtarineqarnerpaaq, saarullik, siuleqqiutigineqassaaq.
- Piniartunik pitsaasunik pisiffigisartagaqarpugut. Sassaalliutigisassagullu aalajangiukkaatssigit taakku attavigaakka oqarlungalu: 'Ulloq una saarullinnik ima oqimaassusilinnik atorfissaqartitsivunga', Claus Schmidt oqarpoq, nangillunilu:
- Taakku kunngikkormiunut nerisassiarisassaariarmata pitsaanerpaanik kangerlummi pisaqarniassallutik aalajangerput. Taamaammat nuannerluinnarpoq. Piniartutsialaapput!
Saarullinnerli taassuminngalu sassaallerneq assigiinngilluinnarput. Claus Schmidtip Katuamilu sulisut kunngikkormiunut siuleqqiusiassatik qaammatini pingasuni misilittarpaat.
- Siuleqqiutip eqqortumik mamaqartinnissaanut misileraavugut. Kuanninik akoqartussaavoq. Mamassaqaaq.
Amerlavallaarunik ajunnginnerusoq
Igaffimmi sulisut nerersuartitsinissami pingasunik tulleriilinnik nerisassiorniarnerminni nunatsinneersunik igaassarsiorsimapput.
Savap neqaa nunatsinneersoq pingaarnertut nerisassiarineqarpoq, taannalu sisamanngornermi ullaakkut kissarsuummut ikineqarpoq.
- Sisamanngornermi ullaarnganiit sakkukitsumiitsillugu siassagipput ilimanarluinnarpoq, taamaalilluni qitullunilu mamartuussaaq. Imusanngorlugu igavarput – ammaaluaaartunngorlugu aggoriaannanngorlugu. Taamaammat mamarluinnassaaq, Claus Schmidt oqarpoq.
Mamassamaangaarmat taanna nammineq igaffiup iigaata illuata tungaaniilluni sassaallerfigineqarusukkaluarpoq.
- Nerisassat mamarluinnartuussapput. Qaaqqusaannginnama uggorigingajappara, igaffimmi pisortaq illalaarluni oqarpoq.
Nerisassallu naammalluassasut neriorsuutigaa. Inunnut 197-inut inniminniisoqarpoq. Igaffimmiilli amerlanerutitsinissaq aalajangerneqarpoq.
- Ullup ingerlanerani allanngortoqartuaannarpoq. Taamaammat 215-iussasut oqarpugut. Taamaalilluta nerisassanik amigartuussanngilagut. Puuguttanik marlunnik amigartooraluarutta tamanna ajussaaq. Amerlavallaarunik pitsaaneruvoq, Claus Schmidt oqarpoq.
Kinguleqqiutissaq ajornakusoortoq
Kinguleqqiutissaq kisimi ajornakusoortitsivoq.
- Kalaallit Nunaanni kinguleqqiusiorniarneq ajornakusuulaarpoq. Maanimi nioqqutissat ajoraluartumik amerlanngillat, Claus Schmidt oqarpoq.
Kinguleqqiutissatut imigassamut akuukkamut piña coladamut assingusumik aalajangiisoqarpoq. Taanna kokosimik, panna cottamik ananasinillu chipsilianit kinguleqqiusiarineqassaaq.
Igaffimmi pisortat sulisullu sinnerisa sisamanngornermi unnukkut sassaallernissaq qilanaaraat.
- Nerersuartoqarnissaanummi qaammatini pingasuni pilersaarusiorpugut. Pilersaarusiarpullu aqagu pisussanngorpoq, taamaammat nuannerluinnarpoq, Claus Schmidt oqarpoq.
