Kunngikkut Sisimiuniinneranni kaffillertoqarpoq, kalattoortoqarluni nuannattoqarlunilu
Danskit tussiutitoqaat asanninnilersaarut ima aallartippoq ‘Tipaatsunnarmat ataasiuneq marluusut attavigiilissapput’.
Erinnap aallartinnerata taallai kunngip umiarsuata Sisimiunut juulimi marlunngornermi nuiasoq tulanneranut tulluarput. Innuttaasorpassuit qilanaarlutik kunngikkunnillu takunnikkusullutik niuffiorput.
Kunngikkormiullu nuimmata innuttaasut talittarfimmiittut qilanaaqisut tipaatsullutik nuannapput.
- ‘ajjjaiii', kunngi Frederik dronning Marylu kalaallisut assuarlutik anillammata talittarfimmi nuannaajummertut taama nipaqarput. Asanninneq qularutissaanngilaq.
- Kalaallit Nunaat taama asatigimmassuk uaguttaaq asavagut. Pingaartumik kunngi, Regine Mathiassen oqarpoq, taassuma kunngi dronningilu takorusullugit Nalunnguarfiup Tasia kaajallallugu “Asanninnerup aqquttaanik” taaneqartartukkoorpoq.
- 1968-mi 1972-milu inunngoratta kunngi dronningilu peqaarivagut, taamaammat maaniinnerat immikkuullarippoq, takoqqinnissaallu qilanaaraara, Regine Mathiassen oqarpoq.
KNR-illu oqaloqatigisai kunngikkunnik takunnikkusuttorpassuupput. Pissangakujunneq ulloq tamaat malunnarpoq, illoqarfilli kunngikkormiunit tikeraarneqarmat tulluusimaarutaaneruvoq.
Sumulluunniit qiviaraanni meeqqat kunngitut niaqorutillit inuillu qungujulaaqisut takussaapput.
Kaagisoriarani takunnikkusuinnartoq
Illoqarfiup innuttaasuisa kunngi dronningilu takorusullugit sumut nikiallattullu ornittarpaat sumilu tamaani pisorpassuupput.
- Kunngikkunnik pingaartitsisuuvugut, kunngikkormiullu asavagut, tulluusimaarutigeqaagummi, illoqarfimmi aaqqissuussat naggaserlugit timersortarfimmi kaffillertoqarnerani Grethe Jensen oqarpoq.
Timersortarfiup isaariaata qulaani Erfalasorput nivingavoq, kunngip dronningillu isernissaat pissanngatigineqarluarpasippoq, innuttaasullu qilanaaqisut qiimmaallapput.
- ‘ajjjaiii', kunngikkut isermata innuttaasut nuannaajummerput. Inuit nikutserupput, ersaattaatileriasaarlutillu. Tamarmilli kaagisorianngillat.
- Takoreeratsigit ingerlasinnaanngorpugut, angut utoqqasaaq takunnereerami timersortarfimmiit aniartuutigaluni oqarpoq.
Asanninnivik allanngunngisaannarpoq
Kalattoortartut aqqaneq-marluk timersortarfimmi kaffillernermi kalattoorlutik takutitsimmata innuttaasut qiimmattarlutik ersaattaateqqilerput.
- Inuppalaarnerat nuannernersaavoq, kunngikkut siullermeerlutik tikeraarneranni takunnikkusulluni timersortarfimmut kaffisoriartortoq, Tina Niebur oqarpoq.
- Atisat ulluinnarsiutit atorpakka, kunngikkullu ikanilu nerrivimmi issiapput, pingaakujuunniartoqanngilarlu.
- Inunnut qanilaartorujussuupput, tikikkuminaatsutullu misiginanngillat, Grethe Jensen aaqqissuussap naammassinngilaarnerani kunngikkullu ingerlaqqinngilaarneranni oqarpoq.
Kunngikkut illoqarfimmut tikinnerat asanninnilersaarummik aallartippoq, kunngikkullu Sisimiuni ullormi ataatsimi tikeraareerneranni asanninnivik allanngunngisaannartoq malunnarpoq.
