Kim kunngikkunnut tunissummik kusanartumik tunniussisoq: Suliarisimasunut ilanngussaq angivoq

Aarrup niaquata saarnga kalaallit siulliit pillugit oqaluttuartumik pinnersaasigaq.

Kunngikkut nunatsinni angalanerminni Nuummut ullumi tikikkamik taama ittumik tunineqarput.

Nuutoqqami inuppassuit katersuussimasut tikilluaqqusereermata kunngi Frederik, dronning Mary, prins Vincent aamma prinsesse Josephine Nuummi kommunip ataatsimiittarfiani pisortatigoornerusumik tikilluaqquneqarput.

Prins Vincent aamma prinsesse Josephine pisarneq malillugu qullermik ikitsinermi ikiuupput. Assi © : Ida Marie Odgaard/Ritzau Scanpix

Tassani borgmesteri, Avaaraq Olsen (IA) tikilluaqqusivoq, tamatumalu prinsip prinsessillu ikiuunneratigut qulleq (qulleq orsutortoq aaqq.) pisarneq malillugu ikinneqarpoq.

Kommuneqarfik Sermersoorlu kunngikkunnut aappariinnut tunissummik tunniussivoq. Taanna eqqumiitsuliortumut Kim Kleist-Eriksenimut suliarineqartussanngortinneqarsimavoq.

- Suliaq soorunami ataqqinarlunilu pissannganartuuvoq. Qaammatini kingullerni sisamani suliaralugu ulapputigingaatsiarnikuuara, Kim Kleist-Eriksen oqarpoq.

Kalaallit siulliit aamma sassuma arnaa

Kim Kleist-Eriksen kunngikkormiut nunatsinnut tikeraarneranni kingullermi eqqumiitsuliaminik saqqummersitsisimasoq Avaaraq Olsenip oqaatigaa.

Prins Henrillu soqutiginnilluarluni suliai tuniniagaanersut apeqquteqarsimavoq. Taakkuli ajoraluartumik tuniniagaasimanngillat. Kim Kleist-Eriksen aalajangersimasumik najoqqutaqarluni eqqumiitsuliorsinnaanersoq aperineqarami tassuuguinnaq akivoq: naamik, tamanna eqqumiitsuliornermik suliaqarnermut killiliisinnaavoq.

Avaaraq Olsenip oqarnera naapertorlugu prins Henriup inuit marluinnaat imminut naaggaarnikuusimasut oqaatigisimavaa, taakkulu tamarmik kalaaliupput.

Kim Kleist-Eriksenilli kunngikkunnut nutaanut nunatsinnut tikeraaqqaartunut eqqumiitsuliaminik tunissuteqarsinnaanini tulluusimaarutigilluinnarpaa.

- Eqqumiitsuliannik tunniussaqarsinnaanera nuannerlunilu ataqqinarpoq. Suliarisimasunut ilanngussaq angivoq, taanna qungujulalluni oqarpoq.

Aarup niaquata saarngata allerortaani sassuma arnaa takuneqarsinnaavoq, qulaanilu kalaallit marluk siulliit nunatsinniittut takuneqarsinnaallutik. Kigutaani kiinarpassuit ullumikkut inuiaqatigiinnut assersuutissat takuneqarsinnaapput.

Kunngip nasai Erfalasorpullu

Nuummi inuppassuit nuuttoqqamut kunngikkunnik takunnikkiartorput. Kalaallit Nunaanni Politiit inuit 600-init 800-inut amerlassuseqartut nalilerpaat.

Lars Dahl aamma Steen Brandt kunngikkunnut qanillivittut ilagaat. Taakkumi kunngi Fredrrik, dronning Mary, prins Vincent aamma prinsesse Josephine saneqqummata assammippaat.

- Assammereerlugit ingerlavugut, asaqqissanngilagut, Steen Brandt qungujulluni oqarpoq.

- Piffissaqarluarlutik ilassivaatigut. Naapinnerat angisoorujussuuvoq, taanna oqarpoq.

Lars Dahlip (saamerleq) aamma Steen Brandtip (talerperleq) kunngikkunnik naapitsinertik nuannarilluinnarpaat.

Taakkulu ullumikkut kisimik kunngikkorsiunngillat. Meeqqerivimmiimmi meeqqat kunngip nasaanik sanaaminnik atorlutik inersimasullu erfalasutsinnik tigummiartut kunngikkunnut aappariinnut marlulissanullu sanioqquttunut aamma ilassinnillutik suaartarput.

Kunngi Frederik, dronning Mary, prins Vincent aamma prinsesse Josephine nunatta kujataanut aqagu aallaqqissapput. Unnugulu Katuami nerersuaaqatigiittoqassaaq.