Ilisimasalik: Kunngi Frederiup neriuutigaa naalagaaffeqatigiinnerup piuginnarnissaa

Kunngi Frederiup oqaasinnaagariligaani aamma atuakkiaani "Kongens Ord"-imi naalagaaffeqatigiinnerup kunngimut immikkut ittumik pingaaruteqarnera malunnarluartoq, kunngikkormiut pillugit oqaaseqartartoq oqarpoq.
"Ataqatigiinneq, pisussaaffik, kunngeqarfik Danmarki pillugu" tassaavoq kunngip oqariartaaseriligaa. Inuit 300.000-it tusarnaartuliullugit sapaatiuppat taama oqarpoq. Assi © : Scanpix
januaarip 21-at 2024 12:05
Nutserisoq Najâraq Egede

Seqinersiuteqartoq aamma qungujulaqaluni qimusserluni aallarataartoq takusareerparput. Qaanaaq takoqqillugu qullilisoq aammami qitornaasa marlulissat kuisikkamik kalaallisut aamma atserneqarnerat takusareerparput.

Kunngi Frederiup immikkorluinnaq Kalaallit Nunaannut atanera qularutissaanngilaq.

Kunngitut sulilernermi ulluani siullermili malunnareerpoq naalagaaffeqatigiinneq pingaartitarilluinnaraa, kunngikkormiut pillugit oqaaseqartartoq Thomas Larsen oqarpoq.

"Ataqatigiinneq, pisussaaffik, kunngeqarfik Danmarki pillugu", kunngimik januaarip 14-iani Christiansborgi miivertitsinermi inuit 300.000-it nalliuttorsioriat tusarnaartoralugit kunnginngortup Frederiup qulingata oqaasinnaagariligaani oqaatsit taakku tusarpavut.

- Kunngeqarfimmik oqaraangami, Danmarki kisiat pineq ajorpaa, Kalaallit Nunaata Savalimmiullu ataqatigiinnut ilaanerat pisarpaa. Taannaana oqaasinnaarilikkamigut naqissuseraa, neriuutigigamiuk ataqatigiinneq nangissasoq, Thomas Larsen oqarpoq.

Kunngi Frederiup naalagaaffeqatigiinneq atuakkiami aamma allaaseraa:

- Kunngitut dronningitullu naalagaaffeqatigiinni ataqatigiissitsiniartuassaagut, Kalaallit Nunaata, Savalimmiut Danmarkimilu kunngeqarfiup sinnerata akornanni ataqatigiinneq sapinngisatsinnik sakkortunerulersinniarsarissallugu. Naalagaaffeqatigiinnermi aqqutigalugu ataqatigiinnerput puigussanngilarput. Tamanna pisussaaffiliivoq.

- Takusinnaasakka malillugit naalagaaffeqatigiinnitsinni imminut qanippugut,  ataatsimuussutigut aamma immikkoorutigut ataqqeqatigiilluta attattuarpavut.

- Kalaallit Nunaannut Savalimmiunullu attuumassutikka, aap, qanittumik atassuteqaatikka sakkortoqaat, immikkullu ittumik kissalaamik uummallu attorlugu tikilluaqqqusaanermik kalaallinit savalimmiormiunillu misigitinneqartuartarpunga, piniartuugaluarpata, aalisartuugaluarpata, eqqumiitsuliortuugaluarpara timersortartuugaluarpata apeqqutaanani.

Aallerfik: ”Kongens Ord”/ Altinget Arktis

Atuagaq nutaaq ”Kongens Ord”, pingasunngormat Danmarkimi atuagaarniarfinni pisiassaalersoq qupperarlugu, naalagaaffeqatigiinnermik kunngi Frederiup pingaartitsinera aamma atuarneqarsinnaavoq.

Kunngi Frederik ilaatigut allappoq, kunngikkormiut tassaajuassasut, ”naalagaaffeqatigiinnermi ikaartarfiit attaveqaatillu”, aamma ”naalagaaffeqatigiinnitsigut ataqatigiippugut. Tamanna pisussaaffiliivoq.”

- Oqaatsit taakku naalagaaffeqatigiinnerup piunissaa ataavarnissaalu inuttut kissaataata annersarigaa takutippaat.

- Arnaata inuunermut isiginnittaasianut qanittunnguuvoq. Dronning Margrethemi kunngitut arnatut atuunnermini naalagaaffeqatigiinnermi qanimut attaveqatigiittuarnissaq pingaartittuarsimavaa, Thomas Larsen oqarpoq.

Politikerinut naleqqiullutik qaninnerusumik attaveqalertartut

Dronning Margrethe ukiut ingerlanerini kalaallit inuiattut atisaannik atikkersoriarluni Kalaallit Nunaanni illoqarfinni nunaqarfinnilu aalateriitigaluni nunamut ikaartarpoq. 

Tamanna innuttaasut ataqqinninnerannik kinguneqarpoq, kunngikkormiut pillugit oqaaseqartartoq oqarpoq.

- Kunngikkormiut Kalaallit Nunaata Danmarkillu qaninnerusumik attaveqatigiilernissaannut sulissuteqarsimanerpaanut ilaapput.

- Politikerit danskit tamarmik, Kalaallit Nunaannik soqutiginninnerminnik – aamma kulturianik oqaluttuarisaaneranillu – kunngikkutulli ersersertitsineq ajorput. Taamaammat isumaqarpunga, kunngikkormiut inuiaqatigiinnik kalaallinik soqutiginnerminnik ersersitsisarnerat pillugu, kalaalerpassuit kunngikkunnik assut nuannarinnittuusut. Danmarkimimi aamma tusarsaaleraluttuinnarpoq, danskit Kalaallit Nunaannik Savalimmiunillu ilisimasaqarnerulernissaat, naalagaaffeqatigiinnerlu eqqarsaatigalugu ataqatigiinnerulernissamut suliniaqataanerulertariaqartut, Thomas Larsen oqarpoq.

Kunngikkut kalaallisoorput Nuummut 2004-mi tikeraaramik - kunngissakkuugallaramik Assi © : Keld Navntoft/Ritzau Scanpix

Kunngikkormiut Savalimmiuni arlalinnut atassuteqartuupput, soorlu Kunngi Frederiup eqqumiitsuliortut, atuakkiortut allaammmi nunarsuarmi neriniartarfinni tusaamasaanerpaat ilaanni Restaurant KOKS-imi piginnittut qanimut attaveqatigigai, DR-ip nangeqattaartuliaani ”Kongehuset i Norden”-imi takuneqarsinnaavoq

Kalaallit Nunaannulli kunngi Frederiup atanerunera qularutissaanngilaq, Thormas Larsen naliliivoq.

- Kunngi Frederiup kunngissatut Kalaallit Nunaannut angalasarnerpassui, immikkuullarissut, Kalaallit Nunaannut immikkorluinnaq misigissuseqalerneranik ersersitsisuupput, Thomas Larsen oqarpoq.