Assit: Nuummit, Koldingimit Lollandimillu kalaallit Københavnimukarlutik kunngimik takunnikkiartortut

- Inuunermi ataasiaannartumik misigisassaavoq, Asiarpak Mikiassen Hjortborg januaarip aallaqqaataani billettimik pisisimasoq oqarpoq.
januaarip 14-at 2024 14:32

Kunngi, Frederik kunngitut ullumi nalunaaqutaq ullup-qeqqanut suaarutigineqarmat Christiansborg Slotspladsip eqqaa inunnik ulikkaavippoq.

Danskit erfalasuat, Dannebrog inuppassuit akornanni takussaanerugunaraluarpoq – kisianni Erfalasorput amerlasuut akornanni aamma erfalatinneqarpoq. Naja S. Petersen, Naja Enoksen aamma Tina Davidsen tamarmik Koldingimi najugaqartut erfalatitsisut ilagaat.

- Amerlasuut oqarfigaatigut: 'Erfalasoq kusanaq'. Takuneqarluarpugut, Naja S. Petersen oqarpoq.

Taakkulu tamarmik pingasuullutik kunnginngortup, Kunngi Frederiup nunatsinnut asanninnerminik siammarterinissaa naatsorsuutigaat.

- Danmarkip nunattalu akornanni ataqatigiinneq qaninnerulersissinnaassagaa tamatumalu saniatigut namminiilivinnissatta ingerlaneranik paasinnitsitsilernissaa neriuutaavoq, Tina Davidsen oqarpoq.

Nuummit billettissamik januaarip aallaqqaataani pisisoq

Kalaallinik Nuummiit Københavnimut angalallutik kunnginngortumik aamma takunnikkiartortoqarpoq. Asiarpak Mikiassen Hjortborg taakku ilagaat.

Asiarpap nammineq oqarnera naapertorlugu "kunngikkormiunik pingaartitsisorujussuuvoq". Taassuma Nuummiit Københavniliarnissaminut januaarip aallaqqaataani billettersivoq, taannalu ataasinngormat tikippoq, pissutigalugu:

- Inuunermi ataasiaannartumik misigisassaavoq. Uanga inunninni kunngini nikittoqaqqikkunanngilaq, taanna oqarpoq.

Lollandimit Københavniliartoq

Bitha Metelmann Danmarkmi naggueqatigiit inuit ataatsimut peqatigiiffianni siulittaasuusimavoq, taanna sivikinnerulaartumik angalalluni aamma peqataajartorpoq.

Bitha Metelmann. Assi © : Helle Nørrelund/ KNR

Tanna Lollandimit Københavnimukarluni pisumut malinnaajartorpoq, taassumalu pisumut kalaallit allat peqatigalugit malinnaanissani pingaartilluinnarpaa.

- 1972-imi dronning Margrethe dronninginngortoqfjernsynikkut isiginnaarpara. Maannakkut oqaluttuarisaanermi pisuummat nammineq isiginnik isigissavara, Bitha Metelmann KNR-ip Kalaallit Illuanni naapikkamiuk oqarpoq.

Taassuma kunnginngortup dronninginngortullu angalaqqaarnerisa ilaat nunatsinnut angalanerussasoq naatsorsuutigaa.