Naalakkersuisoq: Sikkilit innaallagiatortut inatsisitigut akuerisaassapput
![](/sites/default/files/styles/image_934x467/public/2023-10/20120815-062333-pf-1920x1280we_0.jpg?itok=4dsY4LQK)
Sikkilit innaallagiatortut inerteqqutaasut politiit oktobarip aallartinnerani nalunaarutigereeraallu inoqutinut attaveqaqatigiiffitsigut oqallittoqangaatsialerpoq.
Tamanna pissutigalugu Ineqarnermut Attaveqaasersuutinullu naalakkersuisoq, Hans Peter Poulsen suliamik misissuivoq.
Ineqarnermut Attaveqaasersuutinullu Naalakkersuisoqarfik tusagassiuutinut nalunaarummi paasissutissiivoq.
Hans Peter Poulsen danskit angallannermut naalakkersuisuannut allagaqarluni sikkilit innaallagiatortut Danmarkimi malittarisassat assigalugit inatsisitigut akuerisaalersinneqarnissaat qinnutigaa.
- Naalakkersuisut teknologiikkut ineriartornermut, ukiut makkua qamutinik nutaanerusunik saqqummiiviusartumut, soqutiginnillutik malinnaapput. Taakkua ilai Kalaallit Nunaannut annertoorujussuarmik iluaqutaasinnaapput, allallu Kalaallit Nunaanni aqqusinernut naleqquttussaanatik. Aqqusinertigut angallannermut inatsisit innuttaasunut isumannaatsumik ineriartornermik atorluaanissamut periarfissiinissaat Naalakkersuisut sulissutigaat, Hans Peter Poulsen oqarpoq.
Nalunaarut 1970-ikkunneersoq
Malittarisassaq politiit nalunaaruteqarnerannik kinguneqartitsisoq sikkilinut innaallagiatortunut 1979-imi inerteqqutaasunut tunngavoq.
Nalunaarummi 'qamutit assakaasullit tukkaavimmik ingerlatillit […], motoorilersugaanngitsut' nunatsinni sikkilitut nassuiaatigineqartartut allassimavoq.
Tamannali Hans Peter Poulsenip maanna allanngortinniarpaa.
- Aqqusinertigut angallannermut suliassaqarfimmi ullutsinnut naleqquttunik Kalaallit Nunaanni inatsiseqarnissarput Naalakkersuisut pingaartittorujussuuaat. Taamaattumik Angallannermut ministerip ingerlaavartumik oqaloqatigisarnerani aqqusinertigut angallannermut inatsisit nutarterneqarnissaat pillugu oqaloqatigiittarneq aammalu pisariaqarpat kimigiisernissaq, ingerlatiinnassavara, Hans Peter Poulsen tusagassiuutinut nalunaarummi oqarpoq.
Aqqusinertigut angallannermut aqutsisoqarfiup nalunaarummut allannguinissamut missinngersuut maanna sulissutiginiarpaa, taamaalilluni nunatsinni tamanut tusarniaasoqassalluni.
Tamatuma kingorna Aqqusinertigut angallannermut aqutsisoqarfiup aalajangiinnginnerani Naalakkersuisut siunnersuut aalajangiiffigissavaat.