Cykeli innaallagiatortoq immaqa inerteqqutaavoq

Cykelit innaallagiatortut Kalaallit Nunaanni knallertinut piumasaqaatinut ilaatinneqarput, taamaammallu cykelit innaallagiattortut arlaqartut atornissaat inerteqqutaasinnaallutik.

Allattoq Hanna Vestergaard Hviid

oktobarip 10-at 2023 10:47

Nutserisoq Paornánguak Kleist

Kalaallit Nunaanni Politiinit paasineqarsimavoq cykelit innaallagiatortut arlaqartut inatsisinik naammassinninngitsut. Knallertinummi piumasaqaatit assingannik naammassinnissimasussaapput.

Taama Kalaallit Nunaanni Politiit tusagassiorfinnut nalunaarummi allapput.

Tassami paasinarsisimavoq cykelit innaallagiatortut nalinginnaasut piumasaqaatinik naammassinninnissaat ajornakusoorsinnaasoq taamaammallu Kalaallit Nunaanni atorneqarnissaat inerteqqutaallutik.

Innaallagiartortumik cykeleqaruit piumasaqaatinik naammassinninnersoq taamaammat misissortinnissaa politiinit innersuussutigineqarpoq. Nalunaarummi piumasaqaatinik naammassinninngippat akiliisussanngortittoqarsinnaavoq cykelilu innaallagiatortoq arsaarinnissutigineqarluni.

PIUMASAQAATIT SUUPPAT?

Malittarisassat aqqusinerni, sumiiffinni sanaartorfigineqarsimasuni kiisalu assersuutigalugu pinngortitami pisuinnarnut aqqutissiani qimussillu aqqutaanni atuupput.

Knallertinut cykelinullu innaallagiartortunut piumasaqaatit ingerlatitsissutit aaqqissuussaanerat pillugu nalunaarummi nr. 141-mi 1979-imi atuutilersinneqartumiipput (udstyrsbekendtgørelsen).

Tassani allassimavoq knallertit – cykelit innaallagiartortut ilanngullugit:

- suussusaat Transportministeriamit akuerineqarsimassasut

- ingerlatitsissutip saani aqqusinermik minnerpaamik 30 meterinik saqqarsinnaasumik qaammartartoqassasoq

- ersarissumik tunuani aappaluttumik qaammartartoqassasoq aappaluttumillu qinngortartoqarluni, aqqusinermit naapertuuttumik portussusilerlugit ikkunneqarsimasunik ingerlatitsissutillu sapinngisamik tunuani saanilu qanittuaniissallutik

- ersarissumik tusaaneqarsinnaasumik ataatsimik nipilimmik siggartaateqassaaq sianeqarluniluunniit

- aquuteqassaaq assakaasulerfimmut saarlermut ikkulluarsimasumik aqukkuminartumillu

- ingerlanermut unissaateqassaaq qanorluunniit sukkassuseqaraluaraanni oqimaassuseqaraluaraannilu isumannaatsumik, sukkasuumik sunniutilimmillu unitsitsisinnaasumik. Ima Ingerlanermut unissaasigaassaaq, tunuani assakaasup unissaataa ingerlatitsissutip talerpiata tungaani tukkaavik atorlugu aqunneqarsinnaasumik saavanilu assakaasup unissaataa aquutip talerpiata tungaani assannut eqittarfik atorlugu aqunneqarsinnaalluni. Ingerlanermut unissaatit ingerlatitsissutip siuani aquanilu assigiimmik unitsitsisinnaassuseqassapput.

- Assakaasup ikkuffia ajorinngujuitsuilu qajannaatsumik illersorneqarsinnaasumillu ikkulluarneqarsimassapput. Assakaasup ikkuffia tamakkiisoq taasumaluunniit atortui ataasiakkaat napinermit nungullarnermiluunniit qasukkarsimassanngillat.

- Assakaasut tamarmik gummimik pullattakkanik slangeqassapput, assakaasut qalequtai gummiusut, assakaasup saarngi assakaasullu laajarii il.il. ajoqusersimassanngillat assakaasullu qalequtai gummiusut qaani ilusai tamarmik minnerpaamik 1 mm-inik itinersaqassallutik. Assakaasut tamarmik aamma serparnaveeqquteqassapput.

Allisiguk

Løbehjulit, segways, segboard u-runnersillu innaallagiatortut inatsimmut tassunga aamma ilaapput, taakkulu Kalaallit Nunaanni atorneqarnissamut inerteqqutaallutik, taakku piumasaqaatinik naammassinninngitsutut isigineqarmata.

- Cykelertartut cykelitik innaallagiatortut aqqusinerni angallannermut inatsisit iluanni atorsinnaanngippatigit ugguassappata paasilluarsinnaavakka. Inatsilli allatut paasineqarsinnaanngilaq politiillu soorunami atortitsisussaallutik.

- Cykelinik innaallagiatortunik inatsisinik unioqqutitsisunik atuisoqannginnissaa piffissami aggersumi taamaammat ukkatariniarparput, politiit pisortaat Bjørn T. Bay tusagassiorfinnut nalunaarummi oqarpoq.

Aamma atuarukNukappiaraq 16-inik ukiulik Nuummi Qinngutsinni ajunaarpoq

Cykelit innaallagiatortut piumasaqaatinik naammassinnissimappata aquttoq aqqusinermi angallannermut inatsit naapertorlugu aalajangeerlugu ikkuteqqasumik niaqorornaveeqquteqassaaq akisussaanermullu sillimmasersimassalluni.

Cykelimi innaallagiatortumi motoorip cykeli akunnermut 30 km-inik sukkassuseqalersissinnaappagu cykeli motorcykelitut isigineqassaaq, taamaappallu Kalaallit Nunaanni ingerlatitsissutiginissaa inerteqqutaassalluni.

Politiit inatsisit Færdselsstyrelsi peqatigalugu oqaluuserisimavaat inatsisit iluamik paasisimanissaa qulakkeerniarlugu, uppernarsarneqarporlu cykelit innaallagiatortut Kalaallit Nunaanni knallertinut malittarisassanik malinnittussaasut.