Unicef: Meeqqat naalakkersuinikkut eqqumaffigineqannginnerat kukkuneruvoq
- Nunarsuarmi tamarmi nuna ataaserluunniit naalagaaffiit peqatigiit meeqqat pillugit isumaqatigiissutaannik tamakkiisumik eqquutitsinngilaq, Kalaallit Nunaanili inissisimaneq nunanut allanut sanilliullugu ajorneroqaaq, Steen M. Andersen Danmarkimi Unicefimi pisortaaneq oqarpoq- Nunarsuarmi tamarmi nuna ataaserluunniit naalagaaffiit peqatigiit meeqqat pillugit isumaqatigiissutaannik tamakkiisumik eqquutitsinngilaq, Kalaallit Nunaanili inissisimaneq nunanut allanut sanilliullugu ajorneroqaaq, Steen M. Andersen Danmarkimi Unicefimi pisortaaneq oqarpoq.
AAMMA ATUARUK Unicef med i kampen mod overgreb
Taassuma Kalaallit Nunaani kinguaassiuutigut atornerluisoqartarnera ajornartorsiutaasorujussuusoq tikkuarpaa, misissuinerullu takutikkaa meeqqat pingasuugaangata ataaseq kinguaassiuutimigut atornerlunneqartartoq.
Kalaallit Nunaannilu ukiuni makkunani politikkikkut sulinermi meeqqanut atugassarititaasut tunulliunneqarmata, Steen M. Andersenip uggornartuutippaa.
- Kalaallit meerartaannut iliuuseqarnissamik ukkatarinnittoqartorujussuunikuuvoq. Maanna aaqqiiviginiagassat amerlapput soorlu mittarfeqarfiit, aalisarneq namminersulernissarlu, taakku Unicefimiit isumaqarfiginngilagut, kisianni isummerfigisinnaasarput tassaavoq kalaallit meerartaasa tamakkiisumik ukkatarineqanngippata alianartuunera. Ukkatarineqarnissaat pisariaqartinneqaraluaqaaq atugarisaammi naammaginanngillat, taanna oqarpoq.
AAMMA ATUARUK Unicef: Meeqqat pisinnaatitaaffii inatsisiliuunneqarlik
Meeqqat ukkatarineqarput
Tamannali eqqunngitsoq Isumaginninnermut Naalakkersuisoq Martha Abelsen oqarpoq, politikikkummi sulinermi meeqqat ukkatarineqarluartut taanna oqarpoq.
- Isumaqarpunga meeqqat inuussuttuaqqat ilaqutariillu atugarisaat, suli qitiusorujussuusut, naak inuiaqatigiinni ineriartornitsinni mittarfiit allallu sanaartugassat initoorujussuugaluartut, kisianni aallaavittut isumaqarpunga ilaqutariittut atugarisaat suli qitiusorujussuusut, Martha Abelsen oqarpoq.
Meeqqat inuusuttullu sumiginnagaasut ikilisarniarlugit nuna tamakkerlugu iliuusissatut pilersaarummik Naalakkersuisut suliaqarnissaat, Inuit Ataqatigiinnit siunnersuutigineqartoq Inatsisartuni pingasunngornermi aappassaaneerneqarmat, amerlanerussuteqarluartut akuersissutigaat.
.
