Unicef: Meeqqat pisinnaatitaaffii inatsisiliuunneqarlik
- Meeqqaat pisinnaatitaaffiinnut isumaqatigiissut Naalagaaffiit Peqatigiinnut ilaasortat nunat tamarmik atsiornikuuvaat, taakkununnga ilaalluni Kalaallit Nunaat, tassalu Kalaallit Nunaat pisussaaffeqarpoq meeqqat pisinnaatitaaffii pillugit inatsisiliussalluni. Ajoraluartumilli nunat ilaat taamaaliorsimanngillat taakkununnga ilaalluni Danmarki, Danmarkimi Unicef-ip pisortaa Sten M. Andersen oqarpoq.
Kalaallit Nunaata tamanna allangortissinnaangaa Steen M. Andersen isumaqarpoq.
- Meeqqat pisinnaatitaaffiisa inatsisiliuunneqarnissaat maanna Namminersorlutik Oqartussaat peqatigalugit misissorparput. tamannalu iluatsissappat Kalaallit Nunaat maligassiuisuulluarsinnaavoq, Sten M. Andersen oqarpoq.
Meeqqat pisinnaatitaaffii inatsisitigut peqqussutaalerpata, meeqqat atugarisaasa pitsannguuteqarnissaat, Sten M. Andersenip qularinngilaa. Nangillunilu oqarluni inatsisiliuussinermi meeqqat Nunatsinni atugarisaasa nassuerutigineqarneri takujuminarnerulissammata.
Meeqqat Nunatsinni atugarisaasa pitsanngorsarneqarneranni suliniuterpassuit pisariaqartinneqarput. Sten M. Andersen ilaatigut assersuusiorluni taavaa, nunani allani, soorlu Finlandimi, meeqqat pisinnaatitaaffii atuartitsinermut ilaatinneqartartut. Aammalu maani Nunatsinni taamatut iliortoqartaleraluarpat ajornartorsiut ersarinnerujussuussagaluartoq Sten M. Andersenip oqaatigaa:
- Ilinniartitsisut ilinniartitsinerminni tamanna ilaatilerpassuk soorunami meeqqat pisinnaatitaaffitsik pillugu ilisimasaqarnerulissapput. Finlandimi taamatut ilinniartsinneqartarnerup kinguneraa, nunami tassani meeqqat pisinnaatitaaffii pillugit ilisimat allanut naleqqiullugit annertunerujussuuneri, Sten M. Andersen oqarpoq.
Ilinniartitsinermi meeqqat pisinnaatitaaffiisa ilaatinneqarnerat naammaqqajanngitsoq Steen M. Andersen oqarpoq. Taassuma pingaaruteqarnerarpaa, Nunatsinni meeqqat pisinnaatitaaffii pillugit eqqarsartaaserput allanngortinneqartariaqartoq.
- Upperilluinnarpara eqqarsartaatsip allanngortinneqarneratigut meeqqat atugaat pitsanngortinneqarsinnaasut. Aamma pingaaruteqarpoq Kalaallit Nunaanni suliniutilippassuit suliaasa nalilersorluartarnissaat. Suliniutit suut iluatsissimappat suullu aaqqittariaqarpat? Tassalu ilaatigut tamakku Naalakkersuisut peqatigalugit maanna eqqartukkatta ilaat. Taamaakkaluartoq meeqqat atugaat piffissaq sivikitsunnguaq qaangiuppat aaqqinnavianngillat, Sten M. Andersen naggasiivoq.
