Henriette Berthelsen: - Naalagaaffik spiralilerneqarsimasut Danmarkimiittut ikiorserneqarnissaannut akiliisariaqarpoq
Henriette Berthelsen Danmarkimi ukiuni 48-ni najugaqarpoq. Kulturerput immikkut aallaavigalugu tarnikkut ikiorsiinermik ilaqutariinnullu ikiorsiinermik ilinniarsimasuuvoq, sulisartuuvoq, peqatigiiffilerisuuvoq akileraartarlunilu.
Aamma inuusuuttuulluni kalaallit arnat tuusintilikkuutaat nalusamik spiralilerneqarsimasut ilagaat. Taanna 13-it missaannik ukioqarlunili qulingiluanit ikinnerunngitsoriarluni nalusamik spiralilerneqarsimavoq.
Taassumali arnaqaterpassuilu kalaallit allat Danmarkimi maanna najugallit spiralilerneqarsimanermik kingunerluuteqarnertik pillugu tarnikkut ikiorserneqarniarunik tarnip pissusianik ilisimasalimmik oqaloqateqarnermut aningaasartuutissat ilarujussui namminneq akilertariaqartassavaat. Namminerlu akiliisariaqartarnertik naleqqutinngitsoq, taanna isumaqarpoq.
- Danmarkimi najugaqarpugut, Danmarkimilu ukiorpassuarni akileraartareerpugut. Aamma Naalagaaffiup, ministeriunerup peqqissutsimullu ministerip Danmarkimiittuusut akisussaaffigaat. Taamaammat akiliuttariaqarpaatigut.
Spiralilerneqarsimasut nunatsinniittut tarnikkut akeqanngitsumik ikiorserneqarnissamut oqarasuaatikkut siunnersuisarfimmut Tusaanngamut sianerlutik innersuunneqarsinnaapput.
Taakkunannga 87-it tarnikkut akeqanngitsumik ikiorserneqarnissamik neqeroorut atorluarusullugu 2022-mi juunip kingornali sianersimasut, Isumaginninnermik Aqutsisoqarfiup kisitsisaataanni kingullerni erserpoq.
Spiralilerneqarsimasulli Danmarkimiittut tamakkiisumik akiliinngikkaluarlutik tarnikkut ikiorserneqarnissamik innersuunneqarsinnaajumallutik nakorsaminnit tarnip pissusianik ilisimasalimmut tarnikkulluunniit ikiorsiisartumut innersuunneqarsimasariaqarput.
Inneersuunneqarsimasut tarnikkut ikiorserneqarnermut akiligassaasa affangajaa, tassa 40 procentia Naalagaaffiup akilertarpaa. Tarnilli pissusianik ilisimasalimmit ikiorserneqarneq akunnermut 800-t koruunit 1300 koruunillu akornannik akeqakkajuttoq, Danmarkimi tarnip pissusianik ilisimasallit kattuffiat Dansk Psykolog Forbund ilisimatitsivoq.
Tamannalu spiralilerneqarsimasut Danmarkimiittut ilarpassuisa akissaalatsiffigeqigaat, Henriette Berthelsen oqarpoq.
- Taakkua ilarpassui pisortaniit pisartagaqartuupput soraarniussutisiaqartussatullu ukioqarlutik. Taakkualu 400 koruuneertuartarnissaminnut akissaqanngillat.
- Tassa tarnikkut ikiorserneqariaannaanngillat.
Tarnikkut ukiualuit qaangiuppataanngitsoq maannangaarli ikiorserneqarnissaq pisariaqartikkaat
Spiralilerneqarsimasut Danmarkimiittut ikiorserneqarnissaasa paatsiveerusimaarutaasoq, siusinnerusukkut oqaluttuaraarput.
Taakku tarnikkut ikiorserneqalaarnissamik, ikiorneqarnissamik siunnersorneqarnissamilluunniit pisiariaqartitsigunik Psykiatrifondenip oqarasuaatikkut siunnersuisarfia aamma Kalaallit Illuutaat attavigisinnaagaat, nunamut namminermut peqqissutsimullu ministereqarfik nalunaarpoq.
Spiralilerneqarsimasunili ataasiinnannguarmiilluunniit saaffigineqarsimanatik, Psykiatrifonden KNR-imut ilisimatitsivoq.
Arnanullu taakkununnga ikiorsiinissamik neqerooqquneqarsimanatik, Kalaallit Aalborgimi Aarhusimilu Illutaasa pisortaat aamma nalunaarput.
Tarnikkut akeqanngitsumik ikiorsiinermik spiralilerneqarsimasunut Danmarkimiittunut neqeruulersaaratik, nunamut namminermut peqqissutsimullu ministeri Sophie Løhde (V) Folketingimi ilaasortamut nunatsinneersumut Aaja Chemnitzimut (IA) ukiarmi allappoq.
Danmarkimili naalakkersuisut allatut aalajangilertoriaqartut, Henriette erthelsen isumaqarpoq.
Spiralilersuisimanermimmi qulaajaasoqaleruttorpoq. Aamma tusagassiutini inuiaqatigiinnilu oqallisigineqaraangat spiralilerneqarsimasut timikkut tarnikkullu naqisimasaminnik puttallertuulersarnerannik kinguneqartarpoq.
- Misigisavut kanngusunnerujussuarmik, immimut pisuutinnermik, aliasunnermik kamassamillu nassataqarfigisavut spiralilerneqarsimasut allat nunatsinniittut misigisaannut assingupput. Uagut aamma ikiortariaavugut, Henriette Berthelsen oqarpoq.
Taamaammat ikiorserneqarnissaminnut spralilersuisimanermik pilersaarutit malillugit aatsaat 2025-mi qulaajaasoqarunnaarsiisinnaanngikkitsik, taanna isumaqarpoq.
- Taamanikkut misigisakka eqqartorsimatillugit spiralilersuisimanerluunniit oqallisigineqarsimatillugu eqqaasarpassuaqartarpunga. Eqqaasaqaraangamalu assigiinngitsorpassuartigut qisuariartarpunga.
Ikiorsiisussat spiralilersuisimanerup oqaluttuassartaanik ilisimaarinnittariaqartut
Spiralilerneqarsimasut nunatsinniittut Danmarkimiittullu ikiorserneqarnissamik pisariaqartitsisut qassiunersut ilisimaneqanngilaq.
Henriette Berthelsenilli spiralilerneqarsimasorpassuarnik naapitaqartarpoq, naapissimasaalu taamaaliorneqarsimanerminnik kingunerluuteqarput, anniartarput meerartaarusussimagaluarlutillu meerartaanngisaannarsimanermik aliaasuuteqarput.
Arnallu taakku ikiorserneqarnissartik pisariaqartikkaat taakkununngalu ikiorsiisussat spiralilersuisimanerup tamatumalu kingunerisa oqaluttuassartaannik ilisimaarinnittariaqartut, taanna isumaqarpoq.
- Ikiorsiisussat uagut kalaallit allamik oqaluttuarisaaneqarnitsinnik ilisimaarinnittariaqarput. Aamma eqqortumik naammaginartumillu ikiorsiisinnaaqqullugit kulturitsinnik eqqarsartariaatsitsinnillu ilisimaarinninneruleqqaartariaqarput.
Henriette Berthelsen spiralilerneqarsimasorpaallu allat Danmarkimiittut tarnikkut ikiorserneqarnermut akiliutsittalerumallutik ministeriunermut Mette Frederiksenimut (S), peqqissutsimut ministeriusimasumut Magnus Heunickemut (S) peqqissutsimullu ministerimut Sophie Løhdemut arlaleriarlutik allagaqarnikuupput.
Taakkuali Danmarkimi naalakkersuisuinit toqqaannartumik suli akissutisinngillat.