Naalagaaffeqatigiit Ruslandip Ukrainemut sorsunnerata nalaani ataatsimiittut

Nunatta, Danmarkip Savalimmiullu Rusland Issittumi qanoq iliuuseqarfigissavaat?

Apeqqut taanna Naalakkersuisut siulittaasuata, Múte B. Egedep aamma lagmandip Bárður á Steig Nielsenip kiisalu ministeriunerup Mette Frederiksenip naalagaaffeqatigiit aqagu ataatsimiinneranni pinngitsoornavianngilaat.

Bárður á Steig Nielsenip Thorshavnimi allaffiani ataatsimiittoqassaaq, ataatsimiinnerallu Ruslandip Issittumut sunniuteqartumik Ukrainemut sorsunnerata nalaani pissaaq.

- Issittumi Ruslandimut tunngatillugu iliuusissat oqallinnermi pinasuarnerit ilagaat, Rasmus Leander ataatsimiittoqannginnerani oqarpoq.

Taanna Nasiffimmi – Ilisimatusarfimmi Nunanut Allanut aamma Sillimaniarnermut politikkimik sammisaqarfiusumi pisortaavoq. Taassuma oqarnera naapertorlugu naalakkersuisut siulittaasuisa pingasut aqagu ataatsimiinneranni sillimaniarnermut illersornissamullu politikki qitiulluinnartuniissaaq.

AAMMA ATUARUK Naalakkersuisut reagerer: Flere amerikanske radarer i Grønland er ok, men…

Tamanna Ruslandimut kinguneqartitsinermut tunngallunilu Issittup Siunnersuisoqatigiivisa siunissaaannut kiisalu amerikamiut issittumut soqutiginninneranut qanoq iliuuseqarnissamut tunngasut ilaapput.

- Danmarkip Kalaallit Nunaata silaannaanik naalagaaffimmillu nakkutiginninnerulernissaq kissaatigaa, tamanna amerikamiut tungaanniit aamma kissaatigineqarpoq. Nunatta qanoq kissaateqarnera ersarinnginnerulaarpoq, Rasmus Leander oqarpoq, itisiliillunilu:

- Politikerinik nakkutinnittoqarnerulernissaanik isummamik nuannarinnittunik naapitsisoqarsinnaavoq, aamma politikerinik Danmarkip Issittumi sakkussiorneranik ajornartorsiutaalluinnartutut isiginnittunik naapitsisoqarsinnaavoq. Nunattali tungaaniit qanoq kissaateqartoqarnerata ilisimanissaa amigaatigaarput.

Periusissiaq

Naalakkersuisut nunanut allanut tunngatillugu politikkikkut sunniuteqarnerorusuttut Múte B. Egedep siorna naalagaaffeqatigiit ataatsimiilinnginneranni oqaatigaa.

Tassunga atatillugu nunarput nammineerluni nunanut allanut tunngatillugu politikkikkut periusissiaqarusuttoq oqaatigaa.

Taanna suli piariinngilaq, kisianni Rasmus Leanderip periusissiaq taanna nunatta inissisimaffianut akissuteqartitsisinnaasoq oqaatigaa.

Múte B. Egedep politikki taanna aasamut piariissasoq naatsorsuutigalugu KNR-imut marsimi oqaatigaa.

- Nunatsinni susoqarnera isumaqatigiinniarnermilu pilersinneqartussami qanoq allaqqasoqarnissaanut isumaqatigiittoqarsinnaaneranut utaqqikatannalaarpoq. Naalagaaffeqatigiinnermi ataatsimiittoqannginnissaanut uunga naammassineqarsimanersoq ilisimanngilara, Rasmus Leander oqarpoq, nangillunilu:

- Ataatsmiinnermili arlaannik qaqitsisoqarnissaa qularutiginngilara.

Attaveqaatitut ataatsimiititaliap atuuteqqaarnera

Danmarkimi siorna naalagaaffeqatigiit ataatsimiinneranni nunatta, Savalimmiut Danmarkillu attaveqaatitut ataatsimiititaliaq pilersippaat.

Ataatsimiititaliap nunanut allanut sillimaniarnermut illersornissamullu politikki pillugu ukiumut ikinnerpaamik ataasiarluni oqaluuserinnittoqartarnissaa siunertaraa.

Taanna naalakkersuisunut ilaasortanik, Danmarkimi ministerinik aamma Savalimmiuni naalakkersuisunut ilaasortanik ilaasortaqarpoq, taakkulu naalagaaffeqatigiinni ataatsimiittoqarneranut atatillugu siullermeerlutik ataatsimiipput.

AAMMA ATUARUK Island Danmarkilu alapernaarsuinermi paasisanik avitseqatigiittalernissamut isumaqatigiissuteqartut

Ataatsimiititaliallu naleqqunnini uppernarsassagaa, Rasmus Leander isumaqarpoq.

- Nittartakkatigut ataatsimiinnerit saniatigut ukiumut ataasiaannartumik ataatsimiittarniarunik taava matumani nutaaliorneq qanoq piviusumik annertutigiva. Sinaakkutit atuuteersut avataatigut qanoq nutaaliaqartiginerata takunissaa qilanaarnarpoq.