Spiralilersuisimanermut tunngatillugu: Naajap Qarsullu nalunaarusiat utaqqineqartut apeqqutaatinnagit, inatsisip akuerineqarnissaa kissaatigigaat
Folketingi arnat spiralilersorneqarsimasut taarsiiffigineqarnissaannut inatsisip akuerinissaanut utaqqisariaqarpa?
Eqqartuussissuserisoq Jonas Christoffersen Berlingskemiit apersorneqarami taama kaammattuuteqarpoq. Taassuma spiralilersorneqarsimasut pillugit nalunaarusiani marluusuni aappaanik nalunaarusioqataavoq, taannalu naalakkersuisut ukiut marluk matuma siorna aallartippaat.
Tassani immikkut ilisimasallit, arnat tusindilikkaat 1960-ikkunni tamatumalu kingorna ukiuni qulikkaani spiralilersorneqarsimanerat inuiannik toqoraanerusimanersoq misissorpaat.
Arnat spiralilersorneqarsimasut taarsiiffigineqarsinnaanngornissaannut inatsisissatut siunnersuut Folketingimit ullumikkut siullermeerneqassaaq. Tusagassiorfiup Berlingskep ilanngutassiaa naapertorlugu, politikerit inatsisissatut siunnersuutip akuerineqarnissaanut tunngatillugu aggustip 27-anni taasissapput.
Tamanna naalakkersuisut immikkut ilisimasallit inerniliussaannik aamma ullormi tassani saqqummiussissapput.
Nalunaarusialli saqqummiunneqaqqaartariaqaraluarput, Jonas Christoffersen isumaqarpoq.
- Isumaqarpunga naalakkersuisut nalunaarusiat saqqummiutipallattariaqaraluaraat Folketingip taarsiiffigineqarsinnaanissanut inatsisissatut siunnersuutip siullermeerneqannginnerani. Aamma isumaqarpunga Folketingip inatsisissatut siunnersuummut tunngatillugu suliartik naammassisariaqanngikkaat nalunaarusiat saqqummiunneqartinnagit, Berlingskemut taama oqarpoq.
Naaja H. Nathanielsenilli (IA) Qarsoq Høegh-Damillu (N) inatsisissatut siunnersuutip suliarineqalernera nuannaarutigaat.
- Piffissaligaanngitsumik kinguartissinnaanngilarput. Arnanummi sivisuumik utaqqisimasunut ajuusaarnarpallaassaqaaq, Naaja H. Nathanielsen KNR-imut oqarpoq.
Nalunaarusiat kinguaattoornerat isornartorsiorneqartoq
Nalunaarusiat marluk, nunatsinnut Danmarkimullu pingaaruteqarsinnaasorujussuit saqqummiunneqarnissaasa kinguartinneqarnerat arlalinnit isornartorsiorneqangaatsiarpoq.
Naalakkersuisut ilisimatusartut inerniliussaat februaarimi tiguaat suliarli arlaleriarluni kinguaattooqattaarsimavoq.
Nalunaarusiat aggustip naanerani saqqummiunneqarnissaat maajimi oqaatigineqarpoq, tassa folketingimi ilaasortat taarsiiffigineqarnissamik inatsisissap taasiffiginissaat nalaarlugu.
Qarsoq Høegh-Dam Naleqqameersoq isornartorsiuisunut nalunaarusianik siusinnerusukkut saqqummiusseqqusisunut aamma ilannguppoq.
- Nalunaarusiap saqqummiunneqarnissaa sivisuumik kinguartinneqarpoq. (Nalunaarusiat, aaqq.) pingaarnerutinneqarnerusimagaluarpata tamanna maannakkut oqallisigissanngikkaluarparput. Taamaattumik aamma pingaartitassaavoq tamannalu nassuerutigineqartariaqarpoq.
- Nalunaarusiaq saqqummiunneqaannartariaqarpoq, taanna oqarpoq.
Folketingimi ilaasortaaqataa Naaja H. Nathanielsen, inatsisinut atuutsitsinermut naalakkersuisuusimasup suliamut peqataasimasoq aperineqarami, immikkut ilisimasallit akornanni isumaqatigiinnginneq qulaajaanerup nalaani pisimasoq, kinguaattoornermut pissutaanerarpaa.
Immikkut ilisimasallit isumaqatigiinnginnerup kingunerisaanik nalunaarusiaq ataaseq tunniunnagu nalunaarusiat marluk tunniuppaat.
Naaja H. Nathanielsenip allaaserisaq tamatuma kingorna misissoqqaagassanngortippaa - tamanna suliap pitsaassusaanik misissuineruvoq, immikkut ilisimasallit allat ilisimatusarnikkut allaaserisaq saqqummiunneqannginnerani nalilersuineq.
- Utaqqikatattoqarnera paasisinnaalluarpara sulialli ingerlarngata annernartuunera eqqaamasariaqarparput.
Ingammik Christoffersenip naalakkersuisut "utaqqiniinnaratik" nalunaarusianik tamanut saqqummiusseqqusilluni oqaasii immikkut maluginiarpai.
- Tamanna nalunaarusiat taakkua saqqummiunnissaat naalakkersuisunit annilaangassutigineqarneranut ersiutaavoq. Tamannalu uanga isummanni ilumuunngilluinnarpoq.
- Tamalaanik pasilliuteqarnikkut unnerluutiginninnikkulluunnit ajortisaariniarnermut peqataarusunngilluinnarpunga, IA-mi politikeri oqarpoq.
Utaqqisariaqarneq pillugu isumaqatigiinnginneq
Aammattaaq Naaja H. Nathanielsenip oqarnera naapertorlugu, nalunaarusiat inatsisissatullu siunnersuutip maanna oqaluuserineqartussap immikkoortinnissaat pingaaruteqartoq.
- Ministeriuneq utoqqatserpoq arnat pisinnaatitaaffiinik unioqqutitsinerusoq nassuerutigalugu tamannalu tunngavigalugu taarsiissuteqartoqarumaartoq. Taamaattumik inatsisip naammassillugu suliarineqarnissaanut paasissutissat pigineqarput.
- Danskit kalaallillu ilisimatusartut suleqatigiissitaat taamani pilersinneqarmat, inuit pisinnaatitaaffii pillugit qulaajaanermut danskit peqataajumannginnerat, tamannalu tunngavigalugu naalakkersuisut namminneq qulaajaaniarlutik aalajangernerat immikkut ingerlavoq, nangilluni oqarpoq.
Qarsoq Høegh-Dam aamma taama isiginnippoq, inatsisissatullu siunnersuut nalunaarusiat tamanut saqqummiunneqareerpata sulinerup ingerlateqqinnissaanut akornutaasariaqanngitsoq taanna isumaqarpoq.
Taanna isumaqarpoq arnat eqqugaasut naammattumik utaqqisitaareersut taamaattumillu iliuuseqartoqartariaqartoq.
- Inatsisissatut siunnersuummi, pisimasut tunngavigalugit taarsiiffiginninnissaq periarfissanngussaaq. Neriorsuutigineqartut sapinngisamik ajornannginnerpaamik pissarsiarineqarsinnaanissaat uagut suliassaraarput, Qarsoq Høegh-Dam oqarpoq.
Folketingimili ilaasortat taakkua marluk inatsisissatut siunnersuutip imarisai arlallit isornartorsiorpaat.
Tamanna pissutigalugu inatsisip inaarutaasumik taasissutigineqarnissaa kinguartinneqapallappat ajorinngilaat.
Taamaattumik Naaja H. Nathanielsenip piffissaqarnerorusunnera nalunaarusianik utaqqinermut tunngassuteqanngilaq, inatsisissatulli siunnersuutip allanngortinneqarnissaanut periarfissaqalernissamut tunngassuteqarpoq.
- Sukkasuumik, kisiannili aamma peqqissaartumik, suliarineqartariaqarpoq, Naaja H. Nathanielsen oqarpoq.
