Naaja Nathanielsen: Ikiorsiinissaq tulluarnerpaanngilaq pisariaqarporli
30 million koruunit Royal Arctic Linemut tuttussatut illikartinneqartussatut Naalakkersuisut Inatsisartuni aningaasaqarnermut akileraartarnermullu ataatsimiititaliamut qinnutigisaat, ataatsimiititaliap ippassaq akuersissutigai.
Aningaasallu pineqartut inuussutissanik nioqqutissat akitsoraluttuinnarnerinut pakkersimaarinnittussaapput.
- Ikiorsiissutissanik suliaqarnerput tulluarnerpaanngilaq, tamannalu ilisimaaraarput. Oqimaaqatigiissaarilluarpugut, naak aningaasat naleerukkiartornerisa nalaaniikkaluarluta.
AAMMA ATUARUK Aningaasat naleerukkiartorneranni Inatsisartut ataatsimiilerput
Nunatsinnimi ukiumut isertitakitsorpassuupput, najukkallu amerlaqisut ataasiinnarmik pisiniarfeqartarput, taamaammallu nunatsinni najugallit ilaannut akit qaffanneri akisuallaalerlutik, Aningaasaqarnermut naalakkersuisoq Naaja Nathanielsen (IA) oqarpoq.
30 millioner koruunit
Aningaasallu nunap karsianiit illikartinneqartut 30 mio koruuniupput, taamaalilluni Royal Arctic Linep inuussutissanut nillataartumiitussanut qerisunullu containeriisa assartornerisa akia appasinnerulissaaq.
- RAL-imut aningaasaliissutaanngillat, aningaasanik illikartitsivugut RAL-imut aamma iluaqutaasussanik siunertamullu atorneqartussanik, Naaja Nathanielsen oqarpoq.
Ikiorsiissutitullu taaneqartut marlunnik tunngavilersorneqarput:
- Allaffissornikkut suliarinissaa piuminarpoq, sukkasuumillu aallartinneqarsinnaalluni. Inuit ulluinnarni inuuneranni malugineqarsinnaalipallattussaavoq,oqarpoq nangipporlu:
- Aappaattut nunaqarpugut nioqqutissanik assartuinermi umiartuunneqaqqaanngikkunik timmisartukkoorunneqaqqaartariaqartunik. Tassa imaappoq, isaasinnaasut killeqarmata assartuinermi inuussutissat isaasut aamma kalluaruminartorujussuusarput.
AAMMA ATUARUK Akit qaffannerat: Naalakkersuisut nalimmassaatissanik sulissuteqarput
Akileraarutit appaaviginagit
Naalakkersuisut periarfissanik allanik aamma ujartuipput:
- Akileraarutit appaavigigaanni nioqqutissat ilaannai akikillissapput. Imatullu aaqqiinikkut ukiuunerani pilersuineq isumannaariissavarput. Aaqqiinerput torrannerpaanngikkaluatoq ajorisassaanngilaq, Naaja Nathanielsen oqarpoq.
30 million koruunit aningaasaliissutaanngillat, nunallu karsianiit tigusaammata amigartoorutissat qaffassapput.
- Coronap nalaani ikiorsiinerit pineratulli aningaasaliissutaapput. Ukiup naanerani amigartoorutaasussat paasinarsissapput, nunap karsianut naalakkersuisoq oqarpoq.
Amigartoorutillu taakkuupputtaaq akileraartartunit akilerneqartussat.
- Tamatta eqqugaassaagut. Suliniutissanummi allanut aningaasat atorneqartussat ikilissapput. Neriuutigaarali isumaqatigiissutigisinnaassagipput una pisoq tamatsinnut sunniuteqartussaammat aningaasat eqqortumut tuttariaqartut, Naaja Nathanielsen oqarpoq.
