Akit qaffannerat: Naalakkersuisut nalimmassaatissanik sulissuteqarput
Covid-19-ip nunarsuarmi tuniluunnerata aammalu minnerunngitsumik Ruslandip Ukrainemik tiguaaniarluni sorsunnerata kingunerisaanik nunarsuaq tamakkerlugu akit qaffakkiartupiloornerat Nunatsinni innuttaasorpassuit maanna sakkortuumik misigaat.
Pingaartumik utoqqaat, siusinaartumik sulisinnaajunnaarnersiuteqartut, ilinniartut, suliffissaaleqisut aammalu isertitakinnerpaat aningaasaatinnguatik piffissami matumani mumeqattaaqqaarlugit atortariaqartarpaat.
Maannali Naalakkersuisut, aningaasanut inatsisissatut siunnersuummi 2023-mnoortumi neriorsuutigeriikkamittut akit qaffakkiartornerisa iliuuseqarfiginissaa sulissutigileruttorpaat.
Sapaatit akunnerata tulliani saqqummiissasut
Tassa pingaartumik nunatsinni isertitakinnerusut akit qaffakkiartornerannit eqqugaanerisa kingunerisaanik inuuniarnermikkut innarlerneqarnerat annikillisarniarlugu aaqqiissutissanik Naalakkersuisut ulapputiginnipput.
Pilersuisumi:
Makkariina siatsisissaq Rema 1000-meersoq, 500 g: Januaarimi 10,95 kr. - maanna 15,95 kr.
Qallersuut Salami Gølimeersoq 250 g: Januaarimi 24,95 kr. - maanna 34,95 kr.
Makkariina siatsisissaq Omameersoq, 500 g: Januaarimi 21,95 kr. - maanna 29,95 kr.
Brugsenimi;
Naasortat naasuusartallit: Januaarimi: 119 kr. - Juulip aallaqqaataani: 189 kr.
Pølsi Frankfurter, pujuugaq aamma nammineq sanaaq, 1 kg: Januaarimi: 79,90 kr. - Juulip aallaqqaataani: 99,90 kr.
Nersussuup neqaa aserortigaq, 1 kg: Januaarimi: 84,90 kr. - Juulip aallaqqaataani: 99,90 kr.
Tusarfiit: Pilersuisoq Brugsenilu
Aningaasaqarnermut Naligiissitaanermullu Naalakkersuisoq, Naaja H. Nathanielsen (IA) KNR-imut uppernarsaavoq pingaartumik isertitatikkerusunut oqilisaaniarluni iliuusissat piareerneqaliivissut:
- Maannangaaq nikussutiinnarlugu iliuusissagut immikkuualuttukkaarlugit saqqummiussinnaanngilakka, taamaattorli uppernarsarsinnaavara sapaatip akunnerata tulliata aallartinnerani Naalakkersuisunit qanoq iliuuseqarniarnerluta sukumiinerusumik saqqummiussinissarput sulissutigigatsigu, Naaja Nathanielsen (IA) KNR-imut oqarpoq.
AAMMA ATUARUK Nioqqutissat ilaat akitsorrattut: Qallersuutissat 10 koruuninik akitsortut
Taamaalillutik Naalakkersuisut aningaasanut inatsisissatut siunnersuummi aningaasat naleerukkiartornerat akiorniarlugu iliuuseqarnissaminnik ilimasaarutigeriigartik timitalerniarlugu tamaviaarutiginnipput.
- Aningaasanut inatsisissatut siunnersuutip qaqugu naammassineqarnissaa, nunatsinnilu nunani tamalaani sunniinikkut maani nunami aningaasat naleerukkiartornerat qanoq annertutigissanersoq suli paasinarsinngilaq. Qanorluunniit pisoqassagaluarpat qaffariarnissaa ilimagineqartariaqarpoq. Aningaasat naleerukkiartornerat Naalakkersuisut qanimut malinnaaffigaat.
- Taamaammat piffissap ingerlanerani naapertuuttunik suliniuteqarnikkut ingammik akissaatiginnerusunut aningaasat naleerukkiartornerisa akornusiisumik sunniineranik killiliisumik iliuseqartoqartariaqarnersoq, Naalakkersuisut ingerlaavartumik nalilersortuassavaat, Naalakkersuisut ilimasaarutaat aningaasanut inatsimmi taamak allassimavoq.
Illuatungiliuttut iliuuseqaqqusisut
Naalakkersuisut iliuusissatut pilersaarutertik naammassippassuk siunnersuut Inatsisartut Aningaasaqarnermut Ataatsimiititaliaanut nassiunneqassaaq, ataatsimiititaliallu suliaralugu aallartissavaa.
Nioqqutissat ilaasa akitsornerat ingammik uuliap akitsorneranik peqquteqarpoq: Uuliami akitsoraluttuinnarpoq, ingammik Ruslandip Ukrainemi saassusineratali kingorna. Tamannalu nioqqutissanik nunatsinnut assartuititsinermi akigititamut sunniuteqaqaaq, Royal Arctic Linemmi uuliamut tapiliussarititaa qaffangaatsiarpoq.
AAMMA ATUARUK Ataatsimut isigalugu: Nioqqutissat qulit uku akitsornerpaapput
Naalakkersuisut isertitakinnerusunut soorlu utoqqalinersiutilinnut, ilinniartunut SIK-llu isumaqatigiissutaat naapertorlugit akissarsialinnut oqilisaassillutik illuatungiliuttunit aaqqiissuteqalertoqquneqarput.
Assersuutigalugu danskit naalakkersuisuisa nunaminni inunnut nioqqutissat akitsoraluttuinnarnerannit eqqugaanerpaasunut 2023-mi atugassanik 2 milliardit koruuninik illuartitsisoqassasoq siunnersuutigeqqammerpaat.
