Aningaasat naleerukkiartorneranni Inatsisartut ataatsimiilerput
Ukiakkut ataatsimiinneq ullumi aallartinneqarpoq.
Inatsisartut siulittaasuat Kim Kielsen Siumumeersoq sulinerminut atatillugu angalasoq sinnerlugu tullersortaata siulliup Kristian Jeremiassenip Inuit Ataqatigiinneersup ataatsimiinneq ammassavaa.
Inuit Ataqatigiit sinnerlugit sinniisussatut Inatsisartuni ilaasortaq Pipaluk Lynge Rasmussen augustimi sulinngiffeqarnissaminik qinnuteqarnikuummat Mariia Simonsen aggersagaassaaq.
Tamatuma kingorna Naalakkersuisut siulittaasuat Múte Bourup Egede (IA) ammaanermi oqalugiassaaq, oqalugiaataalu aallaavigalugu Inatsisartut ataasinngorpat septembarip ulluisa 26-at oqallissapput.
Corona aamma sorsunneq
Inatsisartuni ilaasortat siunnersuutaat 53-iupput Naalakkersuisullu siunnersuutaat 31-ullutik. Maluginiarnarpoq pisarnermit ataatsimiissutissat ikinnerusut.
Tassungalu pissutaasimassagunaannaasut marluk tassaapput covid-19-ip nunarsuaq tamakkerlugu tuniluunnerata suli atuunnera aammalu minnerunngitsumik Ruslandip Ukrainemik saassussinera februarimili aallartittoq suli ingerlammat.
AAMMA ATUARUK IA-meersoq Pipaluk Lynge-Rasmussen Inatsisartunit sulinngiffeqarniartoq
Pisummi taakku marluk kingunerisaanik nunarsuarmi aningaasaqarnikkut ajornartoorneq annertusigaluttuinnarpoq, taamaammallu aningaasanik naleqarsinnaasunik siunnersuuteqarnissaq ingalassimaneqarsimarpasippoq.
Qanorluunniilli ikkaluarpat nunap aningaasanut inatsisissaa pinngitsoorani kingusinnerpaamik novemberip 15-iani akuerineqareertussaavoq. Naalakkersuisut aningaasanut inatsisissatut siunnersuutaat naapertorlugu nunatta karsia aappaagu 71,4 millionit koruuninik amigartoortussanngorlugu missingersuutissatut siunnersuusiortoqarsimavoq.
Aningaasat naleerukkiartornerat
Ilisimaneqartutulli aningaasanut inatsisissaq pillugu partiit isumaqatigiinnialeruttorput, taamatuttaaq aningaasat naleerukkiartornerat innuttaasunut, pingaartumik isertitakinnerusunut akunnattumillu isertitalinnut annikigisassaanngitsumik innarliisimammat Naalakkersuisut oqilisaassutissanik ujarlernerat suli ingerlammata ukioq manna aningaasanut inatsit kalluarneqassaaq aamma aappaagu amigartoorutissat amerlaneroriaannaapput.
AAMMA ATUARUK Nunarsuarmi ajornartoortoqaraluartoq nunarput suli siuariartorpoq
Aningaasanut inatsisissatut siunnersuut marlunngorpat septemberip 27-anni siullermeerneqassaaq.
Inatsisartut ataatsimiissutissaat Inatsisartut qupperneranni www.ina.gl-imi qimerloorneqarsinnaapput.