IA-meersoq Pipaluk Lynge-Rasmussen Inatsisartunit sulinngiffeqarniartoq
Pipaluk Lynge-Rasmussen siorna apriilimi qinigassanngortikkami 64-init taaguunneqareerluni Inatsisartuni ilaasortanngorpoq. Taannalu Inatsisartunit sulinngiffeqarniarumareerluni poltikkimiit tunuarallarpoq.
Pipaluk Lynge-Rasmussen pinngortitaq pillugu nunarsuaq tamakkerlugu suliniaqatigiiffimmi WWF-imi suliniutinut aqutsisunngoqqammerpoq.
- Avangiiseq sullikkusullugu aalajangerpunga, taanna KNR-imut oqarpoq.
- Inatsisartuni sulissagaanni inuk mattusoorujussuusariaqarpoq. Inatsisartuni naalakkersuisunilumi ilaasortat imaannaanngissinnaasunik apuussiffigineqarsinnaasarput oqaluffigineqarsinnaasarlutillu. Nuannersuinnaanngitsunik tigusisinnaalaartariaqarpoq poliktikeriussagaani. Taava aamma oqaluuserineqartussat aalajangiiffigisassarpassuillu taakkua nukissaqarfigalugillu uummateqarfigalugit inatsisartuni ilaasortaasariaqarmat, avatangiisit uummateqarfigigakkit nukikka avatangiisinut atorusunnerugakkit taama aaalajangerpunga.
Inatsisartut Nunanut Allanut Sillimaniarnermullu Ataatsimiititaliaanni apriilip arfernanni siulittaasunngorpoq, tassa Siumut Inuit Ataqatigiillu naalakkersuisoqatigiilernerisa suaarutigineqarneranniit ullut marluk kingorna.
Erninilu marluk, aappaa marlunnik aappaalu sisamanik ukiulik, Nuummi najugaqarput.
Meeqqanut inuusuttunullu KNR-TV-kkut aamma aallakaatitsisuusarnikuuvoq.
Inuiaat kulturiat oqaluttuarisaanerallu pillugit Ilisimatusarfimmi ilisimatusarsimasuuvoq.
Asuliinnaanngitsumik qinerpaannga
Avatangiisinut tunngasut sorsuutiginiarnerarpatit. Inatsisartuni taamaaliorsinnaannginnavit?
- Inatsisartuni aalajangersakkat, oqaluuserissassat qaqinneqartartut, isummerfigisassallu assigiinngitsorpassuusarput, oqinnerusut oqimaannerusullu, avatangiisinut tunngaannaavittuunnginnamik.
Pipaluk Lynge-Rasmussen Inatsisartut Nunanut Allanut Sillimaniarnermullu Ataatsimiititaliaanni siulittaasuusimavoq. Ataatsimiititaliaq taanna tassanilu siulittaasuuneq akisussaaffeqarfiusorujussuupput. Tassanilu siulittaasuunermini pissarsiaqarlunilu paasisaqarluarsimalluni, taanna oqarpoq.
AAMMA ATUARUK IA-mit politikerip Pipaluk Lynge Rasmussenip NATO tikeraaraa: Issittoq isumannaappoq
Taamaakkaluartoq pinngortitamuinnaq tunngasunik maanna suliaqartussanngorpoq.
Inatsisartunut qinersisutit qanoq oqarfigerusuppigit?
- Avatangiisit pillugit siorna inatsisartunut sassarnikuuvunga, avatangiisillu uummateqarfigigakkit inuuniutigalugu sulissutigerusuppakka. Asuliinnanngitsumik qinerpaannga.
Inatsisartunut qinigaanerit pakatsissutigaajuk?
- Naamerluinnaq- tulluusimaaqaanga uranimut nultolerance eqquteqqinnikuugatsigu aamma tulluusimaaqaanga Siumut Inuit Ataqatigiillu suleqatigilernissat angusimagatsigu. Allanilli suliaqarusuppunga.
Inatsisartunut qinigassanngorteqqissavit?
- Massakkut avatangiisit sullikkusuppakka. Siunissaq oqaaseqarfigivallaarusunngilara.
Pipaluk Lynge Rasmussen sulinngiffeqarnissamik Inatsisartunut ippassaq ataasinngornermi qinnuteqarpoq.
Aappaqanngilaq marlunnillu erneqarpoq. Nukarleq marlunnik ukioqarpoq, angajullerlu sisamanik ukioqarluni.
Mariia Simonsenip Pipaluk Lynge-Rasmussen Inatsisartuni paarlassagaa, nittartakkami valg.gl-imi allaqqavoq.
