- Akerliusoqanngitsumik partiinilu sorlermiinneq apeqqutaatinneqarani sorusunnerluta oqaatigisinnaassallugu pingaaruteqarpoq, Pipaluk Lynge Rasmussen oqarpoq.Assi: Malik Brøns / KNR

IA-mit politikerip Pipaluk Lynge Rasmussenip NATO tikeraaraa: Issittoq isumannaappoq

Inatsisartut Nunanut allanut tunngasunut sillimaniarnermullu ataatsimiititaliaata siulittaasua, Pipaluk Lynge Rasmussen Bruxellesimi NATO-mut tikeraaqqammerpoq. Nunat tamalaat akornanni akerleriinnissuteqartoqarnerani paasisimannilluarnissaq pingaaruteqartoq, taanna oqarpoq.

Sillimaniarneq illersornerlu Inatsisartunut, Lagtingimut Folketingimullu ilaasortat NATO-p qullersaqarfianut Belgiap illoqarfiisa pingaarnersaannut Bruxellesimut sapaatit akunnerata siuliani, atasinngornermit pingasunngornermut tikeraarneranni oqaluuserisassanut ilaapput.

NATO-mut qaaqqussut nutaanngikkaluarpoq, angalanerli piffissami pingaaruteqartumi tassa Ukrainemi sorsuttoqaleruttornerani pivoq.

Inatsisartut Nunanut allanut Sillimaniarnermullu ataatsimiititaliaani siulittaasoq, Pipaluk Lynge Rasmussen (IA) angalaqataasoq taama isumaqarpoq.

AAMMA ATUARUK Sverigep ministeriunerata Nato-mut ilaasortaanissaq ammaappaa

- Ruslandip Ukrainemut sorsunnera pissutigalugu Ruslandimut, Ruslandip qanoq iliorsinnaaneranut NATO-llu nunarsuarmi tamarmi aarlerinartunik sunik isiginninneranut tunngasorujussuuvoq, Inuit Ataqatigiinnit, Pipaluk Lynge Rasmussen oqarpoq.

Siunissami aaqqiagiinngissutaasinnaasut paasisimasaqarfigilluarnerat

Naak Ukrainemi sorsunneq nunanut allanut politikkikkut nunarsuarmi ineriartortoqarneranut isumaqangaatsiaraluartoq, Issittumi sillimaniarnermut pissutsit isumannaatsuusut, Pipaluk Lynge Rasmussen naliliivoq.

- Nangaassuteqartoqartuaannassaaq, kisianni isumannaalluartutut Naagaaffeqatigiinnittugullu misigisimavunga, pissutigalugu Danmark aqqutigalugu NATO-mut ilaavugut, IA-meersoq oqarpoq.

Naalagaaffeqatigiit ajutuuinnissamut ikiuutissaagaluartut siunissami aaqqiagiinngissutaasinnaasut pillugit paasisimasaqarluarnissaq pingaaruteqartoq, Pipaluk Lynge Rasmussen erseqqissaavoq.

- Siunissami aarlerinartut suut nakkutigiuarnissaat aamma ullussaata uatsinnullu takkunnissaannut utaqqiinnarnani qanoq piareersarnissaq NATO-mit angerlaassinnaavakka, taanna oqarpoq.

AAMMA ATUARUK Langstrakt tango om en arktisk strategi fortsætter i det nye år

Taamaammat nunatta Issittumi pingaaruteqarnera ersarissuunissaa kissaatigalugulu issittumi periusissiaq kinguaattooqqangaatsiartoq erinitsaappaa.

- Akerliusoqanngitsumik partiinilu sorlermiinneq apeqqutaatinneqarani sorusunnerluta oqaatigisinnaassallugu pingaaruteqarpoq, Pipaluk Lynge Rasmussen oqarpoq.

Taassumali Naalakkersuisut upperalugit erseqqissaatigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl