Myanmarimi ilungersuusaqartut peqqarniisaarniatut nalilerneqartut

Myanmarmi sakkutuunut pissaanermik tigusisunut akerliusut peqqarniisaarniatut nalilerneqassasut Myanmarimi pissaanermik tigumiartut sakkutuut oqarput.

Akerliussutsimik takutitsisunit, naalakkersuisut siulittaasuatut peersineqartup Aung San Suu Kyip partiiani NLD-mi politikeritut ilaasortanit NUG pilersinneqarpoq.

Innuttaasut NUG-mit naalakkerneqartumik peqqarniisaarniaqquneqartut sakkutuut isumaqarput.

Naalagaaffiup TV-eqarfiani sapaatit akunnerata naanerani nalunaarummi tamanna takuneqarsinnaavoq.

Inuppalaartumik illersornissamut nukinnik pilersitsisimallutik sapaatit akunnerani kingullermi NUG nalunaaruteqarpoq.

Myanmarimi innuttaasut sakkutuunit saassunneqannginnissaanik illersorneqarnissaanik ilungersuussaqarnerarlutik.

AAMMA ATUARUK Myanmarimi inuit tusindilikkaat mumisitsiniartut

NUG-imik oqaloqateqartut, tusagassiortut ilanngullugit, peqqarniisaarniat akiorniarneqarnissaannut inatsit naapertorlugu Myanmarimi unnerluutigineqarsinnaalersut, nutaarsiassaqartitsivik AFP allappoq.

Naalakkersuisut siulittaasuata Aung Suu Kyip tunuartinneqarluni illumit aneqqusaajunnaarnera isumaqatiginagu akerliussutsimik takutitsisut sakkutuunit peqqarniitsumik saassunneqartarput.

Sakkutuut pissaaneq februaarip aallaqqaataani tigummassulli, politikki patsisigalugu tigusarineqarlutik parnaarunneqartut illersorniarlugit inuit 780-it toqutaasimasut, suliniaqatigiiffik AAPP allappoq.

Taama pisoqaraluartoq inuppassuit sapaatit akunnerata naanerani, sakkutuunut kisermaassillutik pissaanermik tigusisunut , akerliunertik takutinniarlugu aqqusinerni akerliusoqangaatsiarpoq.

Sakkutuut pissaanermik tigusinerisa kingorna toqutaasorpassuit saniatigut inuit 4899-it tigusarineqarput.