Kangerlussuarmi meeqqerivimmiut tuttunniartut
Kangerlussuarmi meeqqat meeqqerivimmi Nukameersut pingasut sapaatip akunnerata matuma siuliani tuttunniarput.
Meeqqat ilaasa kissaateqarnerat tunngavigalugu taamaaliortoqarpoq.
- Sulisutut isumassarsiaq pimoorupparput, qanorlu piviusunngortinneqarsinnaanersoq misissorparput, meeqqerivimmi pisortaq Ungaaq Lundblad oqaluttuarpoq.
Tamanna ajornannginnersoq sulisut ingerlaannaq misissorpaat.
- Meeqqanik taama mikitigisunik piniariaqateqarsinnaanermut akuersissummik qinnuteqarpugut, akuerineqarlutalu. Sapaatip-akunneratalu siuliani pingasunngornermi tamanna piviusunngorpoq, Ungaaq Lundblad oqaluttuarpoq.
Meeqqerivimmiut perngaamik piniariartut
Piniartuaqqat taakkua sulisunik kommunimilu pedelimik ilalerlutik illoqarfimmit piniarfimminnut siumut utimullu 10 kilometerit pisullutik ingerlaarsimapput.
Ilungersornerallu kinguneqarluarpoq.
Meeqqat tulluusimaarlutik tuttussimallutik meeqqerivimmut Nukamut uterput.
- Meeqqat nuannisaqaat. Uteratta anaanaasup naapigiarpaatigut, meeqqallu nukarliit ima oqarput: “Uanga aamma tulliani ilaarusuppunga!”, meeqqerivimmilu tamarmi nuannaartoqaqaaq, Ungaaq Lundblad oqarpoq.
Meeqqat sapaatip-akunnerani tamatumani angusaqarluarsimanerminnik nuannaarutiginninniarlutik angajoqqaatik neriartoqqusimagaat, meeqqerivimmi pisortaq oqaluttuarpoq.
Meeqqerivik ileqquliussisoq
Siunissami ukiumoortumik atualertussat tuttunniartinneqartalernissaannik meeqqerivik aalajangersimavoq.
Kalaallit ileqqutoqaannik nunallu pissarititaanik ilisimasaqarneq meeqqeriviup pingaartitaraa, piniartarnermillu attassiinnarumalluni aallartiaarneq pingaaruteqartoq, meeqqeriviup pisortaa isumaqarpoq.
- Taamaattumik aappaagu atualertussat ilagalugit piniariaqqikkumaarpugut, Ungaaq Lundblad oqarpoq.
