Timmisartoq ajutoorsimasoq nassaarineqartoq

Kalaallit oqartussaasuisa timmisartoq ajutoorsimasoq arfininngornermi ualikkulli ujaarilerpaat. Timmisartoq ataasinngornermi ullaap tungaani nassaarineqartoq, Naviair paasissutissiivoq.

Allattoq Nicole Sander Bertelsen

oktobarip 27-at 2025 10:08

Ilanngutassiaq nalunaaqutaq 15:05 nutarterneqarpoq.

Timmisartoq arfininngornermi ualikkut ajutoortoq nassaarineqarpoq.

Naviairip Issittumi Sakkutooqarfik aamma Kalaallit Nunaanni Politiit ujaasinermi suleqatigai. Naviarip timmisartup ataasinngornermi ullaap tungaani nassaarineqarnera nittartakkamini uppernarsarpaa.

Timmisartoq ajutoortoq ataasiinnarmik ilaasoqarpoq. Taanna ajunaarsimavoq, qanigisaalu kalerrinneqarput.

Suliaq politiinut tunniunneqartoq, Naviair allappoq.

Kalaallit Nunaanni Politiit suliamik misissueqqissaarnermi Havarikommissionimi tassa ajutoornerit pillugit misissueqqissaartunut ikiutaaniarlutik ataasinngornermi ualikkut paasissutissiissutigaat, timmisartulli qaqqami Sermitsiami nasssaarineqarfianut qanillinissaq suli periarfissaanngilaq.

Isumaginninnermut, suliffeqarnermut nunamut imminermut avatangiisinullu naalakkersuisup, Bentiaraq Ottosenip oqartussat ujaasinermi suliaqarsimanerannut qujassuteqarlunilu ajunaartup qanigisaanut misiginneqatiginninnermik nassiussaqarpoq.

- Naalakkersuisut sinnerlugit timmisartup aquttuata ajunaartup qanigisai misiginneqatigingaarpakka. Pisoq tamatsinnut itisuumik attuisoq alianarpoq artornarlunilu, Bentiaraq Ottosen tusagassiuutinut nalunaarummi allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.