Sulisussaaleqinerup utoqqarnik isumassuineq ilungersunartorsiortikkaa

Utoqqarnik isumaginnittoqarfimmi ajornartooqqaneq nutaajunngeqaaq. Immikkoortortaqarfimmili oqaluttuarsianik aasap ingerlanerani saqqummertoqarpoq.

Sulisut soraareertussaagaluarlutik paarlatsissatik takkutinngitsooraangata suleqqittariaqartarput. Utoqqaat illuini utoqqaat inissaqarusullutik illoqarfigisaminniit Nuummut nuuttariaqartarput, taamaalillutillu ilaquttaminnut qanigisaminnullu qanimut attaveqarnertik annaasarpaat. Aamma sulisut akissarsiffimmi takkutinngitsoortarneri pissutaallutik utoqqaat pisariaqartumik isumassorneqarnissartik pinngitsoortarpaat. Ajornartorsiutit allat aamma amerlaqaat.

Nalunanngitsumik sulisussaaleqineq ajornartorsiutaanerpaavoq. Kommuneqarfik Sermersuumi utoqqarnut immikkoortortaqarfimmi pisortaq Karen Lund Mølgaard naapertorlugu.

- Utoqqaat illuani inunnik isumaginnittut aalajaatsut suliartortuartullu amerlassusaat ilungersunartorsiorfiunerpaapput, taanna oqarpoq.

Kommuneqarfik Sermersuumimi sulisussaaleqinerup ajornartorsiutit uteqqialersittarpai.

Sulisunik suliartunngitsoortoqartillugu sulisoqatit ima artukkerneqaatigisinnaasarpaat allaat arlallit napparsimallutik sulinngiffeqartariaqartarlutik – ilungersunartorsiornerlu annertusigaluttuinnarpoq.

Immikkoortortaqarfimmi pisortaq naapertorlugu, ajornartorsiut pingaartumik akissarsiffiit nalaanni erseqqinnerpaasartoq.

- Sulisut akissarsiffinni ilungersunartorsiornerpaasarput. Ulluni nalinginnaasuni soorlu massakkut, sulisunik amigaateqartoqanngitsoq takusinnaavarput. Kisianni akissarsiffiugaangat ajornartorsiulertarpugut.

Utoqqaat qassiit ikiuisussat ikinnerusut 

Utoqqarnik isumassuiffimmi ilungersunartorsiortitsinerit sulisut qaammatit naanerini takkutinngitsoortarneri kisimik pissutaanngillat. Kommunittaaq sulisut sivisunerusumik sulisoriinnarsinnaanissaat sorsuutigaa. Ajornartorsiullu tamanna ukiuni aggersuni annertunerulersinnaavoq.

Naalakkersuisut aningaasaqarnermut nassuiaataa naapertorlugu, innuttaasut 67-it sinnerlugit ukiullit amerlassusaat, ullumikkut 4.000-it sinneqartut 2036-mi 7.000-inut amerlissapput. Tamanna ilutigalugu innuttaasut sulisinnaasut 7.000-it missaanniit 6.000-inut ikileriarnissaat piffissami tassani naatsorsuutigineqarpoq.

- Allatorluinnaq eqqarsartariaqalissaagut. Assersuutigalugu nunanit allaniit sulisussarsiorluta. Kisianni soorunami qanoq taakkua sulisinneqassanersut aamma eqqarsaatigissavarput, oqaatsivummi kulturerpullu naluaat. Taamaakkaluartoq taamatut iliuuseqartariaqassagunarpugut, Kommuneqarfik Sermersuumi Utoqqarnik isumaginninnermut ataatsimiititaliami siulittaasoq Nitta Lyberth-Mørch (IA) oqarpoq.

Karen Lund Mølgaard aamma isumaqataavoq. Utoqqaat allamiunik sulisoqarnertik naammagisimaaritsik oqaluttuarisaraat tusartarlugu, taanna oqarpoq. Oqaatsinik aporfeqaraluartunik isumassuisoqarusunnerupput isumassorneqanngivissornermiit.

- Utoqqarnik kinguaariit nutaanik aamma naapitsisarpugut. Utoqqaat nalitsinneersut tamatumunnga sungiussisimasut, immikkoortortaqarfimmi pisortaq oqarpoq. 

Suliassat amerlanerusut tunngavissallu ajornerusut

Kommunip sulisut ilinniarsimanngitsut piginnaanngorsarnerisigut sulisorisat sulisoriinnarniarsarisarpai, isumassuinermimi ilinniartitsinerup naammanngilluinnarnera pissutaavoq. 

Tamanna ilutigalugu utoqqaat “oqimaatsut”-tut taaneqartut amerliartorput. Innuttaasut innarluutillit, qaratsakkut ajoquteqalersimasut allatulluunniit sakkortuumik pisariaqartitsisut. Tamanna sulisunut avatangiisitigullu tunngavissanut piumasaqaateqartitsinerupput.

- Avatangiisitigut atugassarititaasut pitsaanerusinnaagaluarput, taamaalillutik piginnaasatsinnut pisariaqartitsinermut malinnaassagaluarput. Inissaqarnerunissaq innarluutilinnullu innissiat tulluussakkat amerlanerit amigaatigaavut, Karen Lund Mølgaard oqarpoq.

Sulisussaaleqineq, utoqqaat amerliartorneri tunngavissallu naammaginanngitsut utoqqarnik isumaginnittoqarfimmi oqimaaqatigiikkunnaartitsivoq. Ajornartorsiullu tamanna kommunip kisimiilluni aaqqiissuteqarfigisinnaanngilaa. Politikikkut suliniuteqartoqarnissaa aamma pisariaqarpoq, taakku erseqqissaapput.

- Immikkoortortaqarferujussuuvoq, immikkoortoqarfiit aaqqiissuteqarfigerusulluinnakkat arlaliupput, taamaattoqarneratigullu aaqqiissuteqarfissatut sorleq siulliunneqassanersoq pillugu pingaarnersiuisoqartariaqarpoq. Tamannaavorlu aallartitassarput, Nitta Lyberth-Mørch oqarpoq. 

Nutaanik suliniuteqartoqalersoq

Naak ilungersunartorsiortoqangaatsiaraluartoq pimoorunneqarput, aaqqiissutaasinnaasunillu ujartuisoqarpoq, Nitta Lyberth-Mørch oqarpoq.

- Kikkut tamarmik ilungersunartorsiortut ilisimavarput. Taamaammanuna suliassaq pimoorukkipput anguniagassanillu suliaqarusuttugut. Aamma aningaasartuutinut salliussassanullu tunngatillugu. Kommunitsinnimi illoqarfiit arlallit utoqqaat illuinik aamma puiguttortunut immikkoortortaqarfinnik pisariaqartitsipput. 

Aalajangersimasunik pilersaaruteqarpuguttaaq, Karen Lund Mølgaard oqarpoq.

Ilaatigut Tasiilami utoqqaat illuat nutaaq, Ittoqqortoormiini utoqqaat najugaqatigiiffiat Nuummilu puiguttortut angerlarsimaffiat nutaaq. Tamanna ilutigalugu Utoqqaat Illuat Ippiarsullu allamiunik sulisoqartalereerput. Nuummi aamma maanna misilittarniarneqalersoq.