Múte B. Egede akissuteqarnissap sivisunera pillugu: Arsaq Inatsisartuniippoq
Naqqiissut: Paragraf 37-mut apeqqutit amerlipiloorsimasut siusinnerusukkut allassimagaluarpoq. Tamanna kukkuneruvoq, KNR-ip kukkuneq ajuusaarutigaa.
Demokraatinit, Siumumit Inuit Ataqatigiinniillu Inatsisartunut qinikkat naalakkersuisunut – paragraf 37-imik apeqquteqarnitik akiniarneqartarnerata sivisussusaa isornartorsioraat KNR-imit sapaatip akunnerata siuliani allaaseraarput.
Inatsisartunut ilaasortat pisortat suliassaat pillugit paragraf 37 aqqutigalugu paasissutissinneqarnissaminnik pisinnaatitaaffeqarput. Amerlasuulli sivisuallaartumik utaqqisarput.
Naalakkersuisut siulittaasuata Múte B. Egedep ajornartorsiutaasoq ilisimalluarlugulu Inatsisartuni ilaasortat akornanni pakatsineq paasissinnaalluarlugu.
- Ajornanngippat piffissaliussap ulluni suliffiusuni qulit iluini sapinngisaq tamaat atorlugu naammassiniaasoqartarpoq, taamaattorli ilaatigut aamma piffissartorfiungaatiartarnera aamma taana massakkumut takussutissaqarluarpoq aamma paasisinnaavara aamma utaqqikatattoqartarmat, Muté B. Egede KNR-imut oqarpoq.
Atorlittanik amerlanerusunik atorfinitsitsigitsi
Naallu apeqqutit ullut qulit ingerlaneranni akineqartartussaagaluartut Inatsisartunut qinikkat qaammatit marluk tikillugit utaqqisinnaasartut KNR-ip sisamanngormat allaaseraa. Tassungalu atatillugu Mariane Paviasenip IA-meersup atorfilittanik amerlanerusunik atorfinitsitsinissamut piffissanngunnginnersoq oqariartuutigaa.
Múte B. Egedep Naalakkersuisuni atorfilittat amerlineqarnissaat eqqarsaatigineqanngitsoq, taakkumi Inatsisartut sinaakkutigisaat malillugu suliaqarmata. Oqaloqatigiinnissamulli ammallutik oqaatigaa.
- Inatsisartut suleriaasiat toqqammavigalugu paragraf 37-nik apeqquteqarsinnaaneq Naalakkersuisunut tunngaviuvoq, taamaammat Inatsisartuni qanoq aalajangerneq aamma qanoq ingerlatseriaaseqarusunnermiut uagut oqaloqataassaagut. Tassaniipporli arsaq tassanilu aamma aalajangersarneqartussaallutik, Múte B. Egede erseqqissaavoq.
Inatsisartunut qinikkat Inatsisartunut siunnersuusiunnginnerminni naalakkersuisunit ilaatigut akissutissarseqqaartariaqartarput. Utaqqinerullu sivisunera pissutigalugu arlalinnik siunnersuuteqartoqarneq ajortoq, Mariane Paviasenip sapaatip akunnerata siuliani oqaatigaa.