Inatsisartut politikkikkut suliassat aallartinnissaat qilanaarigaat
Inatsisartut ukiaanerani ataatsimiinnerat ippassaq ammaanersiorneqarmat KNR-imiit inatsisartunut ilaasortat sisamat naapippagut. Tamannalu ulloq sutigut tamatigut imartuvoq.
Peqqissutsimut Naalakkersuisoq Mimi Karlsen aammaAalisarnermut Piniarnermullu Naalakkersuisoq Karl Tobiassen Naalakkersuisuuffimminniit tunuarput.
Tamannalu ilutigalugu aamma Namminersornermut Naalakkersuisoqarfimmik nutaamik pilersitsisoqarniartoq nalunaaruteqartoqarpoq.
Inatsisartunullu ilaasortat sisamat KNR-imiit naapippagut.
Taakkulu apeqqutinik assigiinnik aperineqarput, akissutaali assigiinngeqaat.
Lars Poulsen (S):
Ukiakkut ataatsimiinnermi suna qilanaarutigaajuk?
-Immikkut oqaatigissagukku anguniakkat inuusuttunut meeqqanut tunngasut qilanaaraakka eqqartorneqarnissaat. Soorunami aamma tunngaviusumik inatsisissatsinnut tunngasut tamakkua angisuut soorunami eqqartorneqarnissaat qilanaarutigaakka.
Inersuarmi suna oqallisigineqarnerpaassangatippiuk?
-Tunngaviusumik inatsisissaq oqallisaanerpaanissaa ilimagaara. Partiit assigiingitsunik ilaatigut isumaqartarnerat tunngavigalugu oqallinnerit imartuut annertuumik ingerlanneqarnissaat.
Nivi Olsen (D):
Ukiakkut ataatsimiinnermi suna qilanaarutigaajuk?
-Inuit inuiaqatigiinni atungaat ullumikkut naammaginanngilluinnartut eqqartussallugit qilanaarivakka, aamma pingaartorujussuuvoq nunatta aningaasaqarnera aamma inissittussaangatsigu tassanilu inuit atungaat qanoq pittanngoriaateqassanersoq inissittussaassuarput.
Inersuarmi suna oqallisigineqarnerpaassangatippiuk?
-Oqallisaanerpaassangatitara tassavoq uangut tungitsinninngaanniit sukataarutiginerpaasassarput Meeqqat atungaat meeqqat angerlarsimaffiup avataanut inissittartut atungaat.
Aqqalu Jerimiassen (A):
Ukiakkut ataatsimiinnermi suna qilanaarutigaajuk?
-Ataatsimiissutissat nassiunnikuusagut siunnersuutigut soorunami taakku qilanaarnarnerpaatut inissisimapput.
Inersuarmi suna oqallisigineqarnerpaassangatippiuk?
-Pingaarnerpaapajaatut immaqa inissisimasuupput qulequttat ataatsimoortillugit eqqartorneqartussat tassaasut peqqinnissaqarfimmut taavalu peqqissutsimut attuumassuteqartuusut taamaattorli aamma nunatsinni inuussutissarsiortunut tunngasunik ilaatigut taakku oqallisisissiaqartussaassuugut tamaasalu taakku pingaaruteqartutut isigivagut, siger Aqqalu Jerimiassen (A)
Jens Napâtõk (N):
Ukiakkut ataatsimiinnermi eqqartugassatut suna pingaartippiuk?
-Nunaqarfippassuaqarpugut suli eqqaaveqarnikkut pisiniarfeqarnikkut aaqqiifigineqarsimanngitsut allaalluunniit ilai suli imeqarfeqaratik nammineq imertartartariaqarlutik inissisimasut tamakkuupput assigiinngitsut neriuppunga ukiorpassuarni eqqartorneqartarsimasut ilanngullugit aaqqiiffigineqarumaartut, utoqqaallu aamma atugaat qineqqusaataajuartut neriuppugut tamakku aaqqiiffigineqarumaartut.
