Politikerit allaffissornerup kigaannera tamallu oqartussaaqataanerat uninngasoq pillugu isornartorsioraat
Naqqiissut: Paragraf 37-mut apeqqutit amerlipiloorsimasut siusinnerusukkut allassimagaluarpoq. Tamanna kukkuneruvoq, KNR-ip kukkuneq ajuusaarutigaa.
Naalakkersuisut suliaqarnerat arriippallaarpoq, tamannalu tamat oqartussaaqataanerannut ajornartorsiuteqartitsivoq.
Inatsisartuni ilaasortat arlallit oqarput – taakku naalakkersuisunut – paragraf 37 atorlugu naalakkersuisunut apeqquteqaraangamik piffissaq eqqorlugu akineqarneq ajorput.
Anna Wangenheim Demokraatineersoq Inatsisartunut ilaasortat apeqqutiminnut suli akissutersinngitsut ilagaat.
Taassuma erninermi sulinngiffeqartarneq sapaatit akunnerinik 21-nit 37-nut sivitsorneqassagaluarpat tamanna pisortanut aningaasatigut allaffissornikkullu suut kingunissaanersut ilaatigut apeqqutigaa.
Tamanna suli akissutissarsinngilaa:
- Kipiluttunartorujussuuvoq akineqannginnama suli, pissutigalugu siunnersuuteqaraangatta kingunissai akissaalu – qanorlu naleqarneri allattortartussaagatsigu, Inatsisartuni siunnersuutinik qaqitsiniaaraangatta. Taamaattumik kipiluttunartorujussuarmik nalilerusuppara, Anna Wangenheim oqarpoq.
Tamat oqartussaaqataanerat uninngasoq
Paragraf 37-mut apeqqutit Inatsisartuni ilaasortat pisortat ingerlatsineranut paasissutissanik aallerfigisarpaat, taamaalillutillu pitsaanerusumik inatsisissatut siunnersuuteqarsinnaasarlutik
Inatsisartut nittartagaat qimerlooraanni paragraf 37-mut apeqquteqaateqarsimasut allattorsimaffiat takuneqarsinnaavoq. Ukioq manna apeqqutit 59-iupput, taakkunannga 13-it suli akissuteqarfigineqanngillat.
Mariane Paviasen Inuit Ataqatigiineersoq januaarip naalernerani utoqqalinersiaqartut isertitaqarsinnaanerannut killiussaq atorunnaarsinneqaraluarpat aningaasatigut qanoq kinguneqassanersoq apeqquteqarpoq. Ulloq mannalu tikillugu suli akissutisinngilaq.
- Soorunami Naalakkersuisut ilai akipallattartorujussuusarput, kisiat aamma ilaqaramik akiimaartartunik taava taamaaligaangat suliagut aamma uagut utaqqisutut inissittarneri uggornartorujussuuvoq piffissaagallartillugu akineqanngittarneq, taanna oqarpoq.
Najaaraq Møller Siumumeersoq paragraf 37-mut apeqqutit piffissaagallartillugu akineqartannginnerat uggornartuusoq isumaqataavoq. Apeqqutit misissoraanni apeqqutit ullut suliffiusut qulit iluanni akineqassasut allassimajuaannarpoq.
- Paragraf 37-mik nassiussigaangatta ilaanikkut apereqqittariaqartarpugut ilaannikkut qaammat, qaammat sinnerluguluunniit utaqqisarpugut. Tamanna kipiluttunartorujorujussuuvoq, ilaatigut siunnersuutiginiakkanut atortartussaagatsigit taamaammat ilaatigut siunnersuutigisat annaaginnartarpavut taava ataatsimiinnissap tullissaanut utaqqisariaqartussanngorluta, Siumumiit Najaaaq Møller oqarpoq.
Allaffeqarfimmi atorfillit amerlanerusut
Taamaammat apeqqutit akisassat amerlanerungaatsiarput. Mariane Paviasenilu IA-meersoq suliassamut tassunga qanoq aaqqiissuteqartoqarsinnaanersoq aperigaanni ersarissumik kaammattuutissaqarpoq.
- Naluara Naalakkersuisut atorfilittatigut amigartunik sulisoqarnersut, taana immaqa aporfiusimassooq. Naalakkersuisut sulinerminni paragraf 37 tigugaangamikku apeqqutaasorujussuussarami atorfilittat qanoq suliarinninneri, taamaalilluni misissugassat paasisassat akissutissanullu toqqammavissat taakku naammattut pissarsiarisimanngikkaanni akinissaq ajornakusoortorujussuusarami. Taamaammat atorfilittat apeqqutissanut akinissamut amigarsimappata, allatut ajornaqaaq atorfilittat ilaneqartariaqarput, taanna oqarpoq.
Naalakkersuisut naalakkersuisoqarfiillu qanoq suliaqartarnerat misissortariaqarigut, Siumumeersoq Najaaraq Møller isumaqataavoq.
- Paragraf 37 eqqarsaatigalugu Naalakkersuisoqarfiit taamatut kinguartitsisaqartaartarnerminnik akinaveersaartutut isikkoqartarnerannik oqarfigineqartuaannartarpugut, sulisussaaleqinerminngooq apeqqutinngooq amerlanermik taamaattoqartoq. Tamanna Inatsisartuulluni uggornartorujorujussuuvoq, taava apeqqusernarpoq sooruna paragraf 37 taakkua – paragraf 37-inannguilluuniit suleriutsimut pitsaannermik eqqaannerusumik ujartuiffigineqanngitsut.
