Tunngaviusumik inatsisissamut siunnersuut nalornissutaasoq: Inatsisartut nipaappallaarput
Nunatta qaquguugaluarnersoq namminiilivikkuni tunngaviusumik inatsisissaanut siunnersuut naalakkersuisut tallimanngormat saqqummiummassuk qilaatersortoqarpoq, operamik erinarsortoqarluni naalakkersuisullu siulittaasuat Mûte B. Egede (IA) oqalugiarluni.
Naallu naalakkersuisut, tusagassiortut allallu najuukkiartorlutik peqataasut amerlagaluartut pineqartup soorpiarnera innuttaasut suli ilisimaqqissaanngilaat.
Tunngaviusumik inatsisissamut siunnersuutip tamanut saqqummiunneqareerneranit ullut sisamat qaangiuttut innuttasut qanoq isumaqarnersut peqataatinneqarsimanersullu paasiniarlugu KNR aqqusinermi inunnik marlunngornermi apersuivoq.
Amerlasuut tunngaviusumik inatsisissaq pillugu ilisimasakippalaarnertik pissutigalugu apersorneqarusunngillat.
Angerdla Poulsen Nuummi najugaqarpoq, tunngaviusumillu inatsisissaq tusagassiuutitiguinnangajak tusartarsimanerarpaa:
- Suliaq pillugu sukumiisumik paasiniaanikuunngilanga. Isumalioqatigiissitarli pillugu tusagassiuutini, radiomi Qanoruumilu tusartarpara, taanna oqarpoq.
Innuttaasulli peqataatinneqartutut misigisimatinniarlugit Inatsisartut suliaqarnerusimasinnaagaluartut Angerdla Poulsen isumaqarpoq:
- Malinnaatilluarneqarnerusimasinnaagunaraluarpugut. Peqataatinneqarnerulernissarput qilanaaraara atuarnissaalu erinigaara, taanna oqarpoq.
Tunngaviusumik inatsisissamut siunnersuut ullut sisamat matuma siorna tamanut saqqummiunneqareeraluartoq siunnersuut Inatsisartut, naalakkersuisut imaluunniit isumalioqatigiissitap nittartagaanni suli nassaassaanngilaq.
Taannali knr.gl-imi uani tamakkerlugu atuarsinnaavat.
Innuttaasut oqaasissaqarpat?
Isumalioqatigiissitap siunnersuusiorluni sulinerani innuttaasut peqataatinneqangaarsimanngillat.
Innuttaasut qitiunissaat isumaasimagaluarpoq. Isumalioqatigiissitammi saqqummiussaani siullermi ima allaqqasoqarpoq: "Tunngaviusumik inatsisissaq pillugu Isumalioqatigiissitaq atuunnermini illoqarfinnut nunaqarfinnullu tamanut tikinnissamik anguniagaqassaaq".
Tamannali pinngilaq, taakkumi oqaaseqatigiit isumalioqatigiissitap 2022-p aallartisimalernerani peerpai, tunngaviusumillu inatsisissamut siunnersuusiornermi innuttaasut peqataatinneqarnissaannik periarfissiinerigaluaq corona pissutigalugu piffissaqarfigineqarunnaartoq nassuiaatigineqarpoq.
Mûte B. Egedelli tallimanngormat saqqumiilluni oqalugiaammini erseqqissaatigaa inuiaqatigiit akisussaassuseqarnerat innuttaasullu qanoq peqataatinneqarnissaat eqqartugaanut ilaavoq.
Taassuma oqarnera naapertorlugu siunnersuut siunissami tunngaviusumik inatsisissatut ilumut akuerineqassanersoq taasissutigineqalerpat tamatta peqataatinneqassaagut.
Inatsit tunngaviusussaq innuttaasunit taasissutigineqassava?
- Soorunami tassunga ingerlasussaavugut, Mûte B. Egede oqarpoq.
KNR-ip Nuummi marlunngormat ullaap-tungaani aqqusinermi apersugassarsiornerani Louisa Mikaelsen aamma naapinneqarpoq.
Innuttaasullu siusinnerusukkut peqataatinneqanngippallaarsimanerat taassuma ajoraa:
- Inatsisartut peqataatitsiniarnikippallaarsimasut isumaqarpunga, nipaannikooqqaammi. Paasisaqarnerorusussinnaavunga, ajunnginnerusumik nipaatsumiunngitsoq saqqummiussisinnaasuuppata, taanna oqarpoq.
Nunatta qaqugu namminiilivissaa pillugu Mûte B. Egede suli ulluliinngilaq.
