Múte B. Egede: Tunngaviusumik inatsisissatut siunnersuuteqarnikkut namminersulivinnissamut qaninnerulerpugut

Inatsisartut kalallit tunngaviusumik inatsisissaannut siunnersuummik ullumi tunniussiffigineqarput. Naalakkersuisullu siulittaasuata oqarnera naapertorlugu taanna ullut ilaanni innuttaasunit taasissutigineqassaaq.

Allattoq Hanna Vestergaard Hviid

apriilip 28-at 2023 16:26

- Taqqama silarput kusarneroqqiffissaqarani persuarsioqataavoq.

Inatsit tunngaviusussaq pillugu isumalioqatigiissitat siulittaasuat, Ineqi Kielsen Ilisimatusarfimmi inuit 200-t missaanniittut saanni seqinnarilluinnarnera taama nassuiaatigaa.

Orniguttut inatsimmut tunngaviusussamut siunnersuutip Inatsisartunut tunniunneqarnera malinnaaffigiartorpaat.

Persuarsiornartumik tunniussisoqarnerani qilaatersorneq operartoqarpoq, ornigussimasunilu arlallit attortisimapput.

Aamma atuarukKunngeqaranilu toqumut pillaasoqartassanngilaq: Siunnersuutini 49-suni tallimat aaku

Naalakkersuisut siulittaasuat, Múte B. Egede aperigaanni namminersulivinnissamut ullumi qaniliallappugut.

- Aap, qanillineruvoq. Alloriaqqippugut, tunngavissagut annerulerseqqippagut. Taamaalillutalu aamma ukiorpassuarni anguniarneqartoq aamma qalliallanneratut isumaqarluni, taanna persuarsiornartumik tunniussisoqarnerata kingorna KNR-imut oqarpoq.

Siunnersuut oqaluuserineqassasoq

Nunatta namminiilivinnissaa qaqugu piviusunngorsinnaanersoq Múte B. Egedep suli ullulersinnaanngilaa.

- Isumaqarpunga tamatta anguniakkamut ingerlaqatigiinnissamut taamatut anersaaqarluta ingerlassasugut, tamatsinniippoq. Massakkut alloriarnerup tullia tiguarput, inuiaqatigiinnilu massakkut tunngaviusussamik inatsisissatut missingiut oqallisigisinnaanngorlugu sulisinnaanngorpugut.

Nunatsinni inatsit tunngaviusussamut siullermut siunnersuut 49-nik paragraffeqarpoq.

INATSIT TUNNGAVIUSUSSAQ PILLUGU ISUMALIOQATIGIISSITAQ

Nunatsinni namminerisamik tunngaviusumik inatsiseqarnissaq Inatsisartuni siullerpaamik 2007-imi qaqinneqarlunilu oqallisigineqarpoq.
Ukiut qulingiluat qaangiuttut apeqqut qaqinneqaqqippoq, tassanilu Inatsisartunut aalajangigassatut siunnersuutigineqarluni. Nunatsinni inatsit tunngaviusoq pillugu isumalioqatigiissitaliornissaq taperserneqarpoq.
Taamaammat Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat.
Tunngaviusumik inatsimmut "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" siunnersuutaavoq.

Paasissutissarsiffik: tunngavik.gl

Allisiguk

Naalakkersuisut siulittaasuata oqarnera naapertorlugu inatsit tunngaviusussap piariivinnissaanut Inatsisartut suli aalajangiiffissaqarput.

- Suleqatigiiffigisariaqarparput aamma massakkut tunngavissatsinnik pilersitsisoqarpoq, oqallisigisassaraarput. Aammalu ilumut taama ilusilerlugu naammassiniarnerlugu imaluunniit allatut ilaterlugu ingerlaniarnerluta suliassaqalerpugut, Múte B. Egede oqarpoq.

Siunissami tunngaviusumik inatsisissaq innuttaasunut taasititsissutigineqassasoq

Ineqi Kielsenip Ilisimatusarfimmi persuarsiornartumik tunniussisoqarnerani oqalugiarnermini amerikamiut præsidenterisimasaat tusaamaneqarluartoq, John F. Kennedy issuarpaa.

- Immitsinnut aperissanngilagut qanoq nunatta tunissavaanga. Immitsinnulli aperissaagut qanoq nunarput tunniussaqarfigisinnaavarput.

Aamma atuaruk Piareersarneqartuarsimasoq: Tunngaviusumut inatsisissamut siunnersuut ullumi saqqummiunneqassaaq

Múte B. Egedep tunniussisoqarnerani oqalugiarnermini innuttaasut akisussaaqataanerat aamma innuttaasut inatsit tunngaviusussaq pillugu siunnersuutip suliarineqarneranut qanoq peqataatinneqarsinnaanerat pingaartuutippai.

Taassuma oqarnera naapertorlugu siunnersuut siunissami tunngaviusumik inatsisissatut akueriniarneripput tamatta aalajangiiffigissavarput.

Inatsit tunngavisussatut siunnersuut innuttaasunit taasissutigineqassava?

- Soorunami. Tassunga ingerlasussaavugut, Múte B. Egede oqarpoq.