Piareersarneqartuarsimasoq: Tunngaviusumut inatsisissamut siunnersuut ullumi saqqummiunneqassaaq

Tunngaviusumik inatsisissatut siunnersuut nunatta namminiilivinnissaanut tunngaviusussamut siunnersuut ullumi saqqummiunneqassaaq. Taannalu ukiorpassuarni maanna suliarineqarpoq.

Allattoq Martin Pedersen, Nauja Møller

apriilip 28-at 2023 07:04

Nutserisoq Connie Fontain

Kalaallit tunngaviusumik inatsisissaannut siunnersuut siulleq Inatsisartunut tamatsinnullu ullumi tunniunneqassaaq.

Inatsit tunngaviusussaq pillugu isumalioqatigiissitaq suliaqartuuvoq.

Persuarsiornartumut tunnissineq Ilisimatusarfimmi nalunaaqutaq qulinut pissaaq, tassungalu Inatsisartut innuttaasullu qaaqquneqarput.

Naalakkersuisut siulittaasuat, Múte B. Egede (IA) ilaatigut oqalugiassaaq. Taanna marsip naanerani siunnersuummik tunniussivigineqarpoq, aatsaalli pisortatigoortumik ullumikkut tunniussisoqassalluni.

INATSIT TUNNGAVIUSUSSAQ PILLUGU ISUMALIOQATIGIISSITAQ

Nunatsinni namminerisamik tunngaviusumik inatsiseqarnissaq Inatsisartuni siullerpaamik 2007-imi qaqinneqarlunilu oqallisigineqarpoq.
Ukiut qulingiluat qaangiuttut apeqqut qaqinneqaqqippoq, tassanilu Inatsisartunut aalajangigassatut siunnersuutigineqarluni. Nunatsinni inatsit tunngaviusoq pillugu isumalioqatigiissitaliornissaq taperserneqarpoq.
Taamaammat Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat.
Tunngaviusumik inatsimmut "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" siunnersuutaavoq.

Paasissutissarsiffik: tunngavik.gl

Allisiguk

Inatsit tunngaviusoq allatut oqaatigalugu tunngaviusumik inatsisaavoq naalagaaffimmut namminersortumut tunngaviliisoq.

Siunnersuut tunngaviusumik inatsit pillugu isumaqatigiissitap 2017-imi pilersinneqarnerani suliarineqalerpoq.

Siunnersuutillu aatsaat maanna tunniunneqarnissaa siunertaanngikkaluarpoq. Tunniussinissamulli piffissaq arlaleriarluni kinguartinneqarnikuuvoq, ilaatigut Inatsisartunut arlaleriarluni qinersisoqarnera kiisalu isumalioqatigiissitami siulittaasut ilaasortallu nikerarnerat pissutigalugit.

Tamatuma saniatigut coronap nunarsuaq tamakkerlugu tuniluunnera aamma pissutaavoq.

Tunngavik

Inatsimmut tunngaviusumut siunnersuut kalaallit kulturiannik, oqaasiinik kinaassusaannillu tunngaveqartussaavoq.

Isumalioqatigiissitap maanna siulittaasuata, Inatsisartunut Siumumit ilaasortaasimasup, Ineqi Kielsenip isumalioqatigiissitap naak unamminarsimagaluarluni kinguaattoorsimagaluarlunilu suliaqarnera ilorrisimaarutigaa.

Aamma atuarukInatsit tunngaviusut pillugit isumalioqatigiissitaq pilersinneqartoq

- Piffissamik tigusinerpaapput, oqaatsitsinnik amigaateqarsimanerput, oqaatsinillu nutaanik aamma nassaarniarsimanerput. Kisianni aamma ataatsimoorluta isumalioqatigiissitatut aalajangersaaqatigiittarnissatsinnut anersaaqarnerput aamma taanna annertuumik tigusisimavoq, Ineqi Kielsen KNR-imut oqarpoq.

Taanna 2020-mi siulittaasunngorpoq, 2021-milu siunnersuummik tunniussinissamik taamani pilersaaruteqarpoq.

Siunnersuummik tunniussinerup saniatigut isumalioqatigiissitap sulinera naammassissaaq, taamaammallu isumalioqatigiissitaq atorunnaarsinneqassalluni.

Innuttasut ilanngunneqassasut

Inatsit tunngaviusussaq pillugu isumalioqatigiissitap suliaqarnera 2017-imili sisamariarluni allanngorpoq. Tamanna Naalakkersuisuni naalakkersuisoqatigiit nikerarnerannik pissuteqarpoq.

Isumalioqatigiissitap innuttaasut aallaqqaammut ilaatigut ilannguttussaavai, Naalakkersuisulli kingusinnerusukkut aalajangerput kingorna taamaaliortoqassasoq.

Aamma atuarukTunngaviusumik inatsisissaq naammassineqangajalersoq

Inatsit tunngaviusussaq pillugu siunnersuutip tunniunneqarneratigut innuttaasut tigusinissaat aamma oqaluuserinninnissaat Ineqi Kielsenip neriuutigaa.

- Neriuutigisorujussuuara innuttaasut oqallisigissagaat, innuttaasut tigussagaat atuarlugulu. Taavalu aamma unnukkut nereqatigiinnerni allanilu kaffisoriarnerni oqallisigalugu aallartissagaat. Tassa innuttaasut inatsisitigut illersugaanerat uani pineqarpoq.

Sulineq nutaaq maanna aallartippoq, tassa Inatsisartut inatsit tunngaviusussaq pillugu siunnersuutip suliareqqinnissaaq. Ilaatigut kalaallit innuttaasut qanoq ilanngutitinneqassanersut.

Persuarsiornermik tunniussineq tamaat KNR 2-kkut malinnaaffigisinnaavat.