Tunngaviusumik inatsisissaq naammassineqangajalersoq
Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat, taamaasilluni ukiut arfinillingajaat sulereerlutik Tunngaviusumik Inatsisissaq pillugu Isumalioqatigiissitaq suliaminnik tunniussisinnaanngorpoq.
Namminersorlutik Oqartussat tusagassiuutinut taama nalunaaruteqarput.
Nunatta naalagaaffittut namminersulernissaa pillugu tunngaviusumik inatsisissat Isumalioqatigiissitap suliarai.
Inatsit tunngaviusussaq pillugu Isumalioqatigiissitaq
- Nunatsinni namminerisamik tunngaviusumik inatsiseqarnissaq Inatsisartuni siullerpaamik 2007-imi qaqinneqarlunilu oqallisigineqarpoq.
- Ukiut qulingiluat qaangiuttut apeqqut qaqinneqaqqippoq, tassanilu Inatsisartunut aalajangigassatut siunnersuutigineqarluni. Nunatsinni inatsit tunngaviusoq pillugu isumalioqatigiissitaliornissaq taperserneqarpoq.
- Taamaammat Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat.
- Tunngaviusumik inatsimmik "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" suliaqartoqassaaq.
- Siunnersuutit marluk tamanut tusarniaassutigineqassapput.
- Tunngaviusumik inatsisissatut siunnersuut pilersaarut malillugu naalakkersuisunut ukiut ataaseq qaangiuppat tunniunneqassaaq.
Paasissutissarsiffik: tunngavik.gl
Tunngaviusumik Inatsisissaq pillugu Isumalioqatigiissitap siulittaasua Ineqi Kielsen, aamma Siumumi siunnersortaasoq , KNR-imut ilisimatitsivoq, tunngaviusumik inatsisitaassatut missingiutip assersuutigalugu:
'Innuttaasutut pisinnaatitaaffiisa inatsisinit allanit qaffasinnerusunik pisinnaatitaaffigisai, imarissavai, taavali amma innuttaasutut pisussaaffiit maani nunami innuttaasooqataanissamut, imarissava'.
- Tunniukkutsigu naalakkersuisut taakku akunnerminni qanoq atorniarnerlugu eqqartugassaraat, neriuutigisorujussuusarpullu tassaavoq innuttaasut akuulluarumaartut uani.
- Qanoq atueqataarusunnerminnik naalakkersuisugut inatsisartugut utaqqiinarnagit oqallinneq peqataaffigilissagaat aallartitseqataaffigalugu, kia arlaata aallartitsinissaa sapinngisaq tamaat oqallisigisariaqarparput, taanna oqarpoq.
AAMMA ATUARUK Forfatningskommissionen er presset: Politikerne er trætte af at vente
Tamanna Naalakkersuisut siulittaasuata ima oqaaseqarfigaa:
- Tunngaviusumik inatsisissaq pillugu isumalioqatigiissitap suliami tunniunneqarnissaanut ulluliinera nuannaarutigilluinnarpara. Suliap ingerlanneqarnera sivisusimavoq ilaatigullu unammillernartoqartarsimalluni.
- Maannalu Inatsisartut suliap ingerlateqqinneqarnissaa isummerfigissavaat aamma tunngaviusumik inatsisissap nangillugu suliarineqarnissaa ilusilersorneqarnissaalu eqqarsaatigalugit, Naalakkersuisut Siulittaasuat Múte Bourup Egede oqarpoq.
Tunngaviusumik inatsisissatut missingiut isumaliutissiissullu Inatsisartunut tunniunneqassaaq. Tunniunneqareerpat susoqassanersoq Inatsisartut aalajangissavaat.
Suliaq naammassippat isumalioqatigiissitaq atorunnaassaaq.
