Tunngaviusumik Inatsisiliortut: Politikerit utaqqikatapput
Kalaallit Nunaata ullormi namminiiliviffiani inatsimmut tunngaviusumut atuutilersussamut missingiut ukiup naanerani tunniunneqassaaq.
Suliakkiut, isumalioqatigiissitap sulinerminni najoqqutassaa, Naalakkersuisut siorna septembarip pingajuani nutartermassuk tunniussivissaq ukiup naaneranut ullulerneqarpoq.
Inatsit tunngaviusussaq pillugu Isumalioqatigiissitaq
- Nunatsinni namminerisamik tunngaviusumik inatsiseqarnissaq Inatsisartuni siullerpaamik 2007-imi qaqinneqarlunilu oqallisigineqarpoq.
- Ukiut qulingiluat qaangiuttut apeqqut qaqinneqaqqippoq, tassanilu Inatsisartunut aalajangigassatut siunnersuutigineqarluni. Nunatsinni inatsit tunngaviusoq pillugu isumalioqatigiissitaliornissaq taperserneqarpoq.
- Taamaammat Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat.
- Tunngaviusumik inatsimmik "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" suliaqartoqassaaq.
- Siunnersuutit marluk tamanut tusarniaassutigineqassapput.
- Tunngaviusumik inatsisissatut siunnersuut pilersaarut malillugu naalakkersuisunut ukiut ataaseq qaangiuppat tunniunneqassaaq.
Paasissutissarsiffik: tunngavik.gl
Tassanilu inuit tikillugit oqaloqatiginissaannut naalakkersuisut suliakkiuteqanngillat. Politikerit naammassinissamik erinitsanneranik tamanna isumalioqatigiissitap siulittaasuata patsiseqartippaa.
- Tunuliaqutarigunarpaa isumalioqatigiissitap sulinera sivitsorami massakkut. Allanngoqattaartoqarnikuunermik ilaasortatigut aammalu minnerunngitsumik sulisutigut. Taamaammat ilaatigut utaqqikatattoqalerpasilluni politikerit akornanni, Kuupik V. Kleist oqarpoq. Taanna isumalioqatigiissitami siulittaasuuvoq.
Tassami Isumalioqatigiissitap sulileqqaarneraniilli innuttaasut tikinneqartarnissat suliakkiummut ilaagaluarpoq.
AAMMA ATUARUK Inatsit tunngaviusussamik suliaqartut inuit qanimut naapinniarunnaaraat
Taamaalilluni Inatsit tunngaviusussaq pillugu isumalioqatigiissitat naammassisassaat minnerulersimavoq:
Inatsimmut tunngaviusussamut missingiut piareerneqarluni Naalakkersuisunut tunniunneqareerpat innuttaasut tikinneqassasut Kuupik V. Kleist oqarpoq.
- Isumalioqatigiissitap missingersuusiornerat inernerussaanngilaq. Oqartoqarsinnaavoq aallarniutaassasoq pisussanut allanut.
Sooq innuttaasut tikillugit oqaloqatigineqassannginnersut, Naalakkersuisut siulittaasuata akissuteqartinnissaa KNR-imiit suli sulissutingaarput.
