Modernamit coronavirusimut akiuussutissat nunatsinnut nassiunneqalersut

Modernamit akiuussutissat nassiunneqartut siulliit nunatsinnut sapaatit akunneri marluk missaat qaangiuppata tikissapput.

Nakorsaaneqarfik taama paasissutissiivoq.

Akiuussutissat siulliit nassiunneqartut nunatta sapaatip akunnerata 14-iat ingerlanerani (apriilip tallimaanit qulingiluaanut) tigussavai. Modernamit akiuussutissaq Pfizer/BioNtechimeersup tassa maannakkut nunatsinni atorneqartup assigaa.

Modernamiilli akiuussutissap taamaallaat minus 15-init 25-nut nillertigisumiitsinneqartariaqarnera iluaqutaavoq, taamaalilluni nunatsinni assartoruminarnerussalluni.

Pfizer/BioNtechimit akiuussutissaq 80 gradinik nillertigisumiitsinneqartariaqarpoq.

Akiuussutissat naatsorsuutigisamit ikinnerusut

AstraZenecamit akiuussutissap sunniuteqarneranik nalunaaruteqartoqarnikuunera pissutigalugu akiuussutissap Danmarkimi atorunnaarallarneqarnera pissutaalluni Kalaallit Nunaat akiuussutissanik naatsorsuutigisamit ikinnerusunik tunineqassaaq. Akiuussutissamiilli sunniutinik ilumut pissuteqartoqarnersoq suli qulakkeerneqanngilaq – akiuussutissarli taanna maannamut unitsinneqarallaqqavoq.

Nunatsinni AstraZenecameersumik kapitittoqarnikuunngilaq.

Nakorsaaneqarfiup oqarnera naapertorlugu taamaakkaluartoq suli aalaakkaasumik nassiussisoqartarnissaa naatsorsuutigineqarpoq, taamaammat akiuussutissanik kapuinissamut suliniut naatsorsuutigisamit arriinneruleraluarluni ingerlatiinnarneqarsinnaalluni.

AAMMA ATUARUK AstraZenecap akiuussutissaliaanik atuiunnaarneq akiuussusiinermik kinguaattoortitsisinnaasoq

Nakorsaanerup, Henrik L. Hansenip nunatsinni inersimasut tamarmik juunip ulluisa 21-anni inuiattut nalliuttorsiunnginnermi kapitinnissamut neqeroorfigineqarsimanissaat naatsorsuutigalugu oqaatiginikuuaa. Tamannali Danmarkip akiuussutissamik AstraZenecameersumik atorunnaarallartitsinerata kingunerisaanik eqquuttussaarpasikkunnaarpoq.

Siullermik illoqarfiit annersaanni, toqqaannartumik tikiffigineqarsinnaasuni akiuussutissanik kapisisoqarnikuuvoq, tassa Nuummi, Ilulissani, Aasianni, Sisimiuni Qaqortumilu. Aamma Paamiuni Qeqertarsuatsiaanilu kapuisoqarnikuuvoq.

65-inik ukiullit sinnerlugillu kapineqarnikut tamarmik, kiisalu inuit napparsimalerujussuarnissamut immikkut aarlerinartorsiortutut nakorsamit naliliiffigineqarnikut sullinniarneqarnikuupput.

AAMMA ATUARUK Norskit AstraZenecap akiuussutissaliaanik atuiunnaarallarnertik sivitsoraat

Qaammatini aggersuni Avannaani, Tunumi Kujataanilu kiisalu Kitaani illoqarfinni nunaqarfinnilu sinneruttuni akiuussutissanik kapuinerup aallartinnissaa pilersaarutaavoq.

Periusissiamut pingaarnertut anguniakkat tassaapput eqimattat napparsimarujussualernissaminnut toqunissaminnulluunniit aarlerinaateqarnerpaat.

Nappaalanersuaqalernerup siaruaatinnginnissaa pissutigalugu amerlanerpaanik kapuisoqarnissaa anguniagaavoq, nakorsaaneqarfik paasissutissiivoq.

Akiuussutissersuinissamut ima pilersaaruteqartoqarpoq:

Pingasunngorneq apriilip 7-at: Kangerlussuaq (16-inik ukiullit utoqqaallu tamarmik)

Sisamanngorneq apriilip 8-at aamma tallimanngorneq apriilip 9-at: Maniitsoq (50-it sinnerlugillu ukiullit tamarmik)

Sapaatit akunneri 15 aamma 16: Kujataani nunaqarfiit kiisalu Narsaq, Nanortalik aammalu Arsuk (18-inik sinnerlugillu akiullit tamarmik).

Sapaatip akunnera 17: Qeqertarsuaq aamma Qasigiannguit (18-inik sinnerlugillu akiullit tamarmik).

Tunumi innuttaasunut apriilimi/maajimi akiuussutissamik kapisinissamut pilersaarutissat aalajangersimasut sulissutigineqarput.

Akiuussutissanik naammattunik tigusaqartoqarpat, taava aamma qaammatini taakkunani Qaanaami akiuussutissanik kapisinerit ingerlanneqassapput.

Qaqugukkut akiuussutissanik tigusaqarneq apeqqutaatillugu, Upernavimmi aammalu Uummannami nunaqarfiinilu akiuussutissanik kapisinernik ingerlatsinissamut piffissaliussisoqassaaq.

Akiuussutissalersuinerup immikkoortua kingulleq, tassa kitaani illoqarfinni anginerpaani innuttaasunik 65-it ataallugit ukiullit akiuussutissamik kapineqarnissaat (Nuummi, Ilulissani, Aasianni, Sisimiuni, Maniitsumi, Paamiuni aamma Qaqortumi), kiisalu Kitaani nunaqarfinni sinneruttuni, akiuussutissat naammalerpata, ingerlanneqarumaartoq, nakorsaaneqarfik paasissutissiivoq.