AstraZenecap akiuussutissaliaanik atuiunnaarneq akiuussusiinermik kinguaattoortitsisinnaasoq

Nakorsaasiorfiup AstraZenecap coronavirusimut akiuussutissaliaa Danmarkimi akiuussusersuinerni atorunnaarallartinneqarpat, akiuussusersuinernut ataatsimut isigalugu kinguaattoortitsissaaq.

Danmarkimi peqqissutsimut aqutsisoqarfiup pisortaa, Søren Brostrøm, AstraZenecap coronavirusimut akiuussutissaliaa pillugu tusagassiortunik ullumi sisamanngornermi katersortitsisoqarmat taama oqarpoq.

- AstraZenecap akiuussutissaliaa pilersaarusianit piivikkutsigu, taava 65-ileereersimasut tamarmik tamakkiisumik akiuussuserneqarsimanissaannut pilersaarut sapaatit-akunnerinik marlunnik kinguaattuussaaq, Søren Brostrøm oqarpoq.

Danmarkimi 65-ileereersimasut tamarmik maajip ulluisa 16-iat nallertinnagu tamakkiisumik akiuussuserneqarsimanissaat maannamut pilersaarutaagaluarpoq.

AstraZenecap akiuussutissaliaanik atuineq sapaatit-akunnerit kingulliit marluk unitsinneqarallarnikuuvoq. Unitsitsigallarnerup sapaatit-akunnerinik pingasunik ullumi sisamanngornermi sivitsorneqarpoq.

AAMMA ATUARUK AstraZenecap coronamut akiuussutissaliaa ilimagisamit tunillatsaaliisinnaanikinnerusoq

Inuit ilaat taqqamikkut milittoornermi kingorna toqquteqarnerat pissutaalluni AstraZenecap akiuussutissaliaanik atuineq unitsikkallarneqarpoq, AstraZenecallu akiuussutissaliaanik kapineqarneq taqqamikkullu milittoorneq imminnut atassuteqarnersut misissorneqaleruttorluni.

AstraZenecap coronavirusimut akiuussutissaliaa atorneqaqqilersinnaassappat coronavirusimut akiuussusiinissamut Danmarkimi pilersaarut annerusumik eqqornerneqarnavianngitsoq, Søren Brostrøm oqarpoq.

- Apriilip ulluisa 15-ianni atuleqqissiinnaagutsigu akiuussutissanik 220.000-nik taamanikkussamut nillataartitsivinniittuuteqassaagut. Taakku akiuussusiinissamut atulertorsinnaassavagut, Brostrøm oqarpoq.