AstraZenecap coronamut akiuussutissaliaa ilimagisamit tunillatsaaliisinnaanikinnerusoq

Nakorsaasiorfiup AstraZenecap coronavirusimut akiuussutissaliaa tunillatsaaliisinnaanermut nalilerneqarnera pillugu siusinnerusukkut ilisimatitsissutigineqartumit tunillatsaaliisinnaassuseqartiginngilaq.

AstraZeneca sisamanngornermi taama ilisimatitsivoq, misileraanermilu inernerit nutartikkat innersuussutigalugit. Nutaarsiassaqartitsivik Ritzau taama allappoq.

AstraZenecap akiuussutissaliaa 79 procentinik tunillatsaaliisartutut siornatigut nalunaarutigineqarpoq, tunillaatsaaliisinnaassusiali 76 procentiusoq AstraZenecap maanna nalunaarutigaa.

Tassa imaappoq, AstraZenecap akiuussutissaliaanik akiuussuserneqarsimagaanni napparsimalersartut misissuinermi peqataasut akornanni nakorsaataasuusaaserneqartunut naleqqiullugit 76 procentinik ikinnerupput.

Perulullutilli napparsimasunut nakorsaat 100 procentinik tunillatsaaliisinnaassuseqartoq, nakorsaasiorfik ilisimatitsivoq.

AAMMA ATUARUK Norgemi nakorsat peqatigiiffiata siulittaasua: AstraZenecap coronavirusimut akiuussutissaliaa tutsuigineeruppoq

AstraZenecap akiuussutissaliaa Danmarkimi sapaatit-akunneri marluk matuma siornatigut atorunnaarallarneqarpoq, nunallu allarpaaluit aamma taamaaliorlutik.

Akiuussuserneqaqqammersut perululersimanerat nalunaarutigineqareersorlu, Danmarkimi oqartussat AstraZenecap akiuussutissaliaata atorneqarnera unitsikkallarpaat.

AstraZenecalli akiuussutissaliaa nunat ilaanni atorneqaqqilereerpoq.

Akiuussutissap taassuma isumannaatsumik atorneqarsinnaanera Europami Nakorsaatinut Aqutsisoqarfiup, EMA-p, innersuussutigereeraalu taamaaliortoqarpoq.

Danmarkimi peqqissutsimut aqutsisoqarfik nakorsaatinullu aqutsisoqarfik tusagassiortunik ullumi sisamanngornermi katersuutsitsissapput, AstraZenecap coronavirusimut akiuussutissaliaanut atatillugu nalilersuinertik nutaaq tassani saqqummiutissallugu.