Norgemi nakorsat peqatigiiffiata siulittaasua: AstraZenecap coronavirusimut akiuussutissaliaa tutsuigineeruppoq

Norgemi innuttaasut nakorsaasiorfiup AstraZenecap coronavirusimut akiuussutissaliaanik tutsuiginnikkunnaariartuinnarlutillu akiuussutissaq taanna atorusukkunnaariartuinnarpaat. Norgemi nakorsat peqatigiiffiata siulittaasua, Marte Kvittum Tangen, taama oqarpoq.

AstraZenecap coronavirusimut akiuussutissaliaa Norgemi innuttaasut ilaannut tunniunneqarsimasoq sakkortuumik saniatigut sunniuteqarsimasoq tamannalu innuttaasut akiuussutissamut taassumunnga tatiginnikkunnaariartornerannik kinguneqartoq, taanna Norgemi naalagaaffiup tv-qarfianut NRK-mut oqarpoq.

AstraZenecap akiuussutissaliaa Norgemi marsip ulluisa aqqarnannili atorneqarunnaarallarpoq, Danmarkimi atorneqarunnaarallarnera ilutigingajallugu.

Tamanna inuit AstraZenecap akiuussutissaliaanik akiuussuserneqarsimasut ilarpaaluisa qaqutigoorluinnartumik atugaasumik taqqamikkut milittoorujussuarsimanerannik pissuteqarpoq.

AAMMA ATUARUK WHO-p coronamut akiuussutissat AstraZenecameersut atorunnaarneqartariaqarsorinngikkai

Nakorsiat coronavirusimut akiuussutissamik sorlermik akiuussuserneqarnissartik eqqumaffigileraluttuinnaraat, Norgemi nakorsat namminersortut oqaatigaat. AstraZenecap coronavirusimut akiuussutissaliaata saniatigut Pfizer/BioNTechip Modernallu akiuussutissaliaat EU-mi taamalu Danmarkimi atugaapput.

Pfizer/BioNTechip coronavirusimut akiuussutissaliaa nunatsinni atugaavoq.

Danmarkimi inuit marluk AstraZenecap akiuussutissaliaanik akiuussuserneqareernerminni taqqamikkut milittoornermik qaratsamikkulluunniit aanaartoornermik toqquteqarsimapput.

AstraZenecap akiuussutissaliaanik akiuussuserneqarneq taqqamikkullu milittoornerit imminnut atassuteqarnersut suli ilisimaneqanngilaq.