Mittarfittaassaq neriuuteqalaaleqqikkunarpoq
Paamiuni mittarfissaq suliarineqassanersoq ilimanarunnaariarluni ilimanarseqqippoq. Paamiut borgmesteriat Lars Sørensen ullaap-tungaa, ilisimatitsivoq Inatsisartut angallannermut ataatsimiititaliaanni Siumup IA-llu ilaasortaasa Paamiuni mittarfissap piviusunngortinneqarnissaa sulissutigileraat paasitinneqarsimalluni.
Angallannermut naalakkersuisoq Jens Napaattooq radioaviisimut ippassaq oqarpoq, sanaartugassani pingaarnersiuineq pissutigalugu Paamiuni mittarfiliassap aqquserngata inaarnissaanut aappaagumut aningaasaliissutissat peerneqarallartariaqartut, mittarfissarlu ukiunilu quliniit 15-it tungaanut pilersaarusiornissamut ilanngunneqarumaartoq.
Paamiuni suluusalinnut mittarfittaassap aqquserngata aappaagu inaarneqarnissaanut atatillugu aningaasaliisoqartariaqartoq Inatsisartut angallannermut ataatsimiititaliaanni Inuit Ataqatigiit Siumullu ilaasortaatitaasa erseqqissaatigaat.
Ataatsimiititaliap siulittaasua
Inuit Ataqatigiinneersoq Agathe Fontaini oqarpoq sanaartugassanut aningaasaateqarfimmit Paamiut mittarfissaanut aqquserngup inaarsarnissaanut akissanik immikkoortitsisoqareersimassasoq naatsorsuutigini. Agathe Fontain aamma oqarpoq angallannermut ataatsimiititaliami amerlanerussuteqarlutik taama innersuussuteqarlutik, ualerulu nalunaaqutaq sisamanut ataatsimiilerunik siunissami angallanneq pillugu naalakkersuisunut innersuussutissatik eqqartussagitik.
- Kujataani mittarfiliortiternissanut atatillugu Paamiut siulliuttariaqartoq innersuussutigissavarput, soorlu inatsisartut siornatigut taama aalajangereersimasut, Agathe Fontain oqarpoq.
Taamaattoqarnera Siumup gruppiani siulittaasup Per Rosing Petersenip uppernarsarpaa.
Paamiut borgmesteria Lars Sørensen neriuuteqaqqilernerarpoq, ingammik mittarfiliassap tungaanut aqqutip inaarsarnissaanut aningaasaliiumasoqalersoq tusaramiuk, oqaatigineqareersutulli inatsisartut angallannermut ataatsimiititaliata innerssuussutissartik ualeru aatsaat eqqartortussaavaat.
