Kuupik Kleist Misissuisoqalinnginnera pakatsinarpoq
Nunatsinni politiit eqqartuussisussaatitaasuisa suliat politikkerinut pingasunut tunngasut ingerlateqqinniarnagit aaliangermata pineqartut akornanni oqiliallattoqarlunilu pakatsisoqarpoq.
Eqqarsarnarsinnaagaluarpoq politiit misissuiniarnatik aaliangernerat nuannaajaalaataassasoq. Kuupik Kleistili pakatsivoq.
Aamma atuaruk Hammond, Kleist aamma Lynge unnerluunneqalinngillat
- Politiit pinerluttuliortoqarsimanngitsutut naliliinerat tusaatissatut akueriinnartariaqarpara. Naak annertunerusumik susoqarsimaneranik qulaajaasoqarnissaa kissaatiginaraluartoq, Kuupik Kleist KNR-imut oqarpoq, nagillunilu;
- Imaaliinnarluni pinerluttuliortoqarsimannginneranik nalunaaruteqartoqarnera sumik tunuliaqutaqarnersoq paaserusunnaraluarpoq. Aamma uannut apeqqutit arlallik paasisimanngisakka paaserusussimassagaluarpakka.
Aamma atuaruk Politikeri unnerluussut pillugu: Nuannerpallaanngilaq
Kuupik Kleist naalakkkersuisuni siulittaasuunermini Namminersorlutik Oqattussanut akiligassaminik akiligassitsinneqartarsimanerarpoq. Naalakkersuisuujunnaareerlunili ukiut aappaa avillugu kukkunersiuinermut ataatsimiitsitaliap saqqumiinissaata tungaanut Namminersorlutik Oqartussanit tusagaqarsimannginnerarpoq.
Taamaammat ataatsimiitsitaliap Kuupik Kleist 25.000 koruuninik akiligassaqarneranik saqqummiussimmat tupaallassimalluni oqaluttuarpoq. Taarsigassani ingerlaannaq akilersimavai.
Tamatuma kingorna Kuupik Kleist 21.000 koruuninik akiligassinneqaqqissimavoq. Tamannalu inuttaata paasiuminaatsippaa eqqattuussissuserisuminullu suliaq misissortillugu.
- Septemberimi 2014-imi 25.000 koruunit missaanniittunik akiligassinneqarpunga, taakkulu akilerpakka. Taava kingusinnerusukkut nutaamik akiligassinneqarpunga 20.000-it sinnilaarlugit. Taamaattumik susoqarsimanera paaserusunnaraluarpoq, naak akiitsorinerarneqartut immikkoortereernikuugaluarlugit, Kuupik Kleist oqarpoq.
Qulaajaasoqartariaqartoq
Kisianni taassuma Naalakkersuisut siulittaaasuattut Namminersorlutik Oqartussani suliat ajunngitsumik ingerlanissaat taamani akisussaaffigaa. Taamaammat nammineq eqqumaneruusariaqarsimanngikkaluarnerluni:
- Tassami qularutissaanngilaq akisussaaffik uanniimmat. Taamaakkaluartorli qanorpiaq iliuuseqarfigineqarsimaneri tamakkiisumik qulaajarneqarsimasutut isiginngilakka, Kuupik Kleist suliap unitsineqarneranut pakatsisoq oqarpoq.
Ingerlariaqqittoqarpoq
Naalakkersuisuni siulittaasuusimasup maannalu folketingimi ilaasortap, Aleqa Hammondip, politiit suliamik ingerlatitseqqinniarnatik nalunaarnerat oqiliallaatigalugu unnersiorpoq.
- Suliaq ingerlanikuungaammat oqiliallannarpoq, aamma ingerlariaqqissuunga, Aleqa Hammond naatsumik KNR-imutoqarpoq.
Taanna Naalakkersuisuni siulittaasuugallarami Nunatta Karsianit 204.000 koruuninik atornikuuvoq. Taarsigassanilu taarsereersimallugit.
KNR-imit Steen Lynge, Atassummeersoq, oqaaseqartinniarlugu pissarsiariniaraluarparput iluatsinnaguli.
