Politikeri unnerluussut pillugu: Nuannerpallaanngilaq
![](/sites/default/files/styles/image_934x467/public/article_images/aleqa-hammond-kuupik-kleist-steen-lynge.jpg?itok=C_8LwJMZ)
KNR-ip Kuupik Kleist aamma Aleqa Hammond ullaap tungaani oqaaseqartinniaraluarpai, Kuupik Kleistili Sermitsiaq.AG-mut oqaaserisaminut innersuussivoq, Aleqa Hammondilu oqaaseqarusunnani.
Steen Lyngep suliap naammassineqarnissaa qilanaaraa.
- Politiinut unnerluutigineqarnera tusaatissatut tiguara. Aamma eqqortumik suliarineqarnissaa soorunami naatsorsuutigilluinnarpara. Ilerasuutissaqannginnama suliaq naammassinissaa qilanaaraara, Steen Lynge oqarpoq.
Aamma atuaruk Politikerit pingasut politiinut unnerluutigineqarput
Tunuliaqutiminiillumi aamma tapersersorneqarpoq. Steen Lynge politiinut unnerluunneqaraluartoq Folketingimut qinigassanngortinneqarnera partiimit tamakkiisumik tapersersorneqartoq, Atassutip siulittaasua Knud Kristiansen tusagassiuutinut nalunaarluni allappoq.
Aamma Siumup Aleqa tapersersorpaa
Aleqa Hammond unnerluussutigineqarnermi pillugu Facebookikkut aamma allappoq.
- Pissutsit isumaqatiginngikkaanni politiilersuussineq aqqutissaanersoq demokratiimik aaqqissuussaanerput aqqutissaanersoq isumaqarpunga akulerunneqartoq, Aleqa Hammond, Facebookimi nammineq quppernermini allappoq.
Partiiminiillu tapersersorneqartoq, Siumup allattaa Mikael Petersen KNR-imut oqarpoq.
- Siumup Aleqa Hammond 100 procentimik tapersersorpaa, Mikael Petersen oqarpoq.
Aamma atuaruk VIDEO Unnerluutiginnittoq: Nunatta karsianik atornerluineq unittariaqarpoq
Kuupik Kleist unnerluussut pillugu Sermitsiaq.AG-mit ippassaq apersorneqarnerminut innersuussivoq.
- Illersuisora ataatsimeeqatigaara. Taamaammat annertunerusumik oqaaseqarsinnaanngilanga. Kikkulluunniimmi politiinut suliassanngortitsisinnaapput. Soorunami uangaalluni nuannerpallaanngilaq, suliarli qanorluunniit inerneqassagaluarpat akisussaaffimmik tigusinera siornatigut takutereerpara, Kuupik Kleist Sermitsiaq.AG-mut oqarpoq.