Misissuisartoqatigiit angerlarsimaffinni nakuusertarnernik paasiniaasut

Meeqqanut ilaquttanullu allanut nakuusernerit inuiaqatigiinni inituallaarmata unitsinneqartariaqarsorineqarput.

Nakuusertarneq inuiaqatigiinni annertuumik ajornartorsiutaavoq, taamaattumillu unitsittariaqarluni, naalakkersuisut, Qanigisariinni nakuusertarnerup akiorneqarnissaa pillugu iliuusissatut pilersaarummik nutaamik sapaatit akunneri marluk matuma siornagut saqqummiussaqartut taama oqariartuuteqarput. Tassuunga atatillugu Aqqaluaq B. Egede (IA), taamanikkut meeqqanut, inuusuttunut ilaqutariinnullu naalakkersuisuusoq (maanna meeqqanut, inuusuttunut ilinniarnermut, timersornermut ilageeqarnermullu naalakkersuisuusoq) oqarpoq:

- Uagut inuiaqatigiittut nakuusertarnerup unitsinnissaanut akisussaasuuvugut ilaqutariinnilu nakuusertoqartartoq paasigutsigu inuiaqatigiittut akuleruttussaavugut.

Kisianni oqartussat nakuusertoqartillugu aatsaat akuliussinnaapput paasisaqarunik. Tamannalu angerlarsimaffiup iluani pigaangat, paasineqarnissaa ajornarnerujussuusarpoq.

Taamammat Kalaallit Nunaata Politiivi immikkut ittumik misissuisartoqatigeeqarput, ilaqutariinnik persuttaaffiussunik naammatuuiniartussanik. Tamanna assersuutigalugu sulianik persuttaasoqarsimaneranut eqqisssiviillliortoqarsimaneranullu tunngasunik misissuinikkut ileqqunillu persuttaanermik ajornartorsiuteqarneranik ersersitsisunik nassaarniarnikkut pisassaaq.

Politiit immikkut ittumik misissuisartoqatigiivisa pisortaat, Lars Bjerregaard, taama oqarpoq.

- Angerlarsimaffinni eqqissiviilliornernik imaluunniik nakuusertoqarneranik politiini kaleritikkaangatta, orniguttortatta suliaat ataasiusarpoq. Ilaqutariilli nakuuserfiusartuunersut paasiniaraanni piffissami sivisuumi politiinut kalerriutigineqartut misissorneqartariaqarput, orniguttartortatta ataasiarlutik ornigunnerminni tamanna paasinianngimmassuk, oqarpoq nangillunilu.

- Taamaammat kalerriutigineqartartut tamarmik misissuiffigineqartarput paasiniarlugu ilaqutaat kikkut, nakuusersiusarnersut paasiniarsaralugu.

Suliaq pingaaruteqartorujussuuvoq, ilaqutariinni nakuusertarneq piffissami sivisuumi paasineqarani iliuuseqarfigineqaranilu pisarsimappat, pingaartumik meeqqanut inuusuttunullu sakkortunerusumik tussinnaasarmat, Lars Bjerregaard oqarpoq.  

- Meeqqat inuusuttullu tassaapput najugaqatiminnut qanittumik attaveqartartut. Taamaammat ilaqutariit nakuuserfiuppata, oqqaffiusarpata imaluunniit aalakoornartunik imerfiuallaartuuppata taakkuusarput misigissutsimikkut ineriartornermikkullu artorsarnerpaasartut. Taamaammat politiinit misissuisarnermut pingaaruteqartorujussuuvoq.

Politiit immikkut ittumik misissuisartoqatigiivisa ilaqutariit, uteqqiattumik nakuuserfiusut paasigaangamikkut, ilisimalikkatik kommunimut ingerlateqqittarpaat, taakku inunnik isumaginnittoqarfimmiit iliuuseqarsinnaassammata.

- Ilaqutariit meerartaqarlutillu inuusuttortaqartut suleqatigiinnitsigut ikiorsinnaagutsit angusassaq pitsaanerpaassaaq. Paasissutissat angerlarsimaffinnilu pissusilersuutaasartut qanoq innerinik ersersitsisut, oqartussanut iliuuseqarsinnaasunut ingerlateqqittarpavut, Lars Bjerregaard oqarpoq.

Politiit kingunerluutinik takunnissinnaanngortinneqassasut

Misissuisartoqatigiit pingasuupput, politiitut ilinniarsimanngikkaluarlutik, inuit inuunerminni aqqusaakkaminnik kingunerlutsitsisut imaluunnniit tarnip pissusaanik iliortarialinnik oqaloqartartnermik (psykologimik) immikkut ilisimasaliullutik. Ilaqutariit nakuuserfiusut kikkuunerisa paasiniarnerisa saniatigut, misissuisartoqatigiit politiinik pikkorissaasarput, pikkorissaassutaat tassaasarluni nakuusernermik eqqugaasunik qanoq sullillugit aallartinneqassanersoq.

Politiit ilaatigut kingunerluutit suusinnaanerinik ilisimatinneqartarput, nakuuserfigineqarsimasorlu eqqortumik qanorpiaq sullinneqassanersoq sakkussaminnik tunineqartarlutik, Lars Bjerregaard oqaluttuarpoq.

- Inuit inuunerminni aqqusaakkaminnik kingunerlutsitsisut, soorlu kinguaassiutitigut atornerlunneqarsimasut, sulittarpagut. Taakku misigisatik tunngavigalugit pissusilersuutaat qanoq issinnaanersut politiit ilikkartarpaat, oqarpoq nangillunilu.

- Killisiuinitsinni, apeqqutit eqqortut apeqqutigisarpagut? Killisiueqqittariaqarpugut? Inuit inuunerminni aqqusaakkaminnik kingunerlutsitsinersut killisiuinermi siullermi malunnarpa? Tamakkuupput inuit inuunerminni aqqusaakkaminnik kingunerlutsitsisut pillugit, immikkut ittumik misissuisartoqatigiit suliassaasa illaat politiinullu annguttagaat. Politiit taamaalillutik pinerluffigineqarsimasunik, inuunerminni aqqusaarsimasatik pissutigalugit kingunerlutsitsisunik oqaloqateqarnissamut pikkorinnerulertarput. 

Immikkut ittumik misissuisartoqatigiit politiinik pikkorissaanerminni ilisimasaminnik ingerlatitseqqittarput, suliani aalajangersimasuni taakku atorsinnaaniassammatigit. Politiit taamaalillutik aamma pikkorissarnermikkut qaffassartarput. Inuiaqatigiinni aamma poitiinik tatiginninninneq annerulissasoq anguniarparput, Lars Bjerregaard oqarpoq.

- Pinerluffigineqarsimasut, uagutsinnut ornigullutik nalunaarutiginnikkiartortut aamma sullinnerat pisariaqartumik pitsanngussaaq. Apeqqutit eqqortut apeqqutigisarnerisigut inummik isumaginnilluarnerulissaagut. Kingunerisarpaalu politiinut tatiginninnerulerneq, aamma inuunerminni aqqusaakkaminnik kingunerlutsitsisut tatiginnilernermikkut politiinut nalunaaruteqarnissamut sapiissuseqalertarput tunuarsimaarunnaarlutillu.

Immikkut ittumik misissuisartoqatigiit ukioq ataasingajak sulereerput.