Misissuineq: Qilalukkat qernertat 20-30 kilometerisut ungasitsigisumi nipiliornernit akornusersorneqartarput

Qilalukkat qernertat nipiliornernit ima akornusersorneqartigisinnaasarput allaat nerisasarsiorunnaartarlutik. Københavnimi universitetimit Pinngortitaleriffimmiillu misissuinerup tamanna takutippaa.

- Qilalukkat qisuariartarnerisa ersillutillu uippakajaartut ersersittarpaat. Toortaarpaluttumik, neriniarnerminni atortakkaminnik, nipiliortarunnaartarput. Itisuumut aqqassaartarput. Aatsaallu aarlerileraangamik pisarnermissut sissamut qanittumiittarput. Taamaaliortarnerat nipiliortoqartillugu nerisassarsiorsinnaannginnerannik isumaqarpoq, misissueqataasuusoq, Pinngortitaleriffimmi uumasuleritooq, Outi Tervo, oqarpoq.

Qilalukkat qernertat 20-30 kilometerisut ungasitsigisumi nipiliornernit sunnerneqartartut, misissuinermi erserpoq.

- Ataasiarluta allaat 40 kilometerisut ungasitsigisumiit taama sunnerneqartut uuttorparput. Arferit taama ungasitsigisumiit sunnerneqarnerat uuttorsinnaagatsigu tupannarpoq, misissueqataasoq, Københavnimi universitetimi professori Susanne Ditlevsen oqarpoq.

Sivisuumik nipiliorfigineqarunik kingunerlussinnaasoq

Arfeeqqat nipiliornermiit qimaagaangamik nukimmik atuinerusaqaat. Tamanna uumasumut, nukimmik sipaartuartariaqartumut pitsaanngilaq. Tassami meterinik hundredelikkaanik aqqarnerminni nerereerunillu puinissaminnut iltipiluunersuaq atortussaavaat.

Ilisimatusartut angallatip motoria, silaannarmillu qaartitsisaarut, uuliasiornermi atorneqartartoq nipiliortillugit Tunumi misileraasimapput.

- Kisianni sivisunerusumik nipiliorfigineqarunik- soorlu assersuutigalugu qanittumi umiarsualiviliortoqarluni umiarsuarnik aalaakkaanerusumik angallattoqalerpat - qilalukkat qernertat neriniartarnerat sivisunerusumik sunnerneqarpat, arfeeqqanut kinguneqarnerlussaaq. Tamanna timaasigut kingunerlussinnaavoq qilalukkallu qernertat qasujanerulersinnaapput, Outi Tervo oqarpoq.

Iliuuseqartoqarnissaa pisariaqarsinnaasoq

Aamma tamakkua issittup uumasorigaat, imarpivissuarnut allanut nuuginnarsinnaanngitsut, Susanne Ditlevsen eqqaasitsissutigaa.

Nunatta, Canadap Norgellu avannaani Svalbartip imartaaniinnapajaaq uumasuupput.

- Paarinissaannullu nunat taakkua akisussaasuunerpaapput, Susanne Ditlevsen oqarpoq.

Qilalukkat qernertat nipiliornerup saniatigut aamma immap kissarneruleriartorneranit immallu ilaanni aamma piniarnermit tatineqartut, taanna oqarpoq.

Ilisimatusartut aarleqqutigaat issittumi allanngoriartorneq, arfeeqqat naleqqussarnissaannut naleqqiullugu sukkavallaassasoq, taakkua illersorniarlugit annerusumik iliuuseqartoqanngippat.

- Imartat ilaat qilalukkanut qernertanut ima pingaaruteqartigaat, tamakkunani inuit akornusersuinissaasa inerteqqutiginissaanut tunngavilersuutissaqarluni. Allani immaqa qanoq sukkatigisumik angalasinnaanissamut immaqaluunniit motorinik innaallagiartortunik nipiliornikinnerusunik ingerlateqarnissamik malittarisassiornissaq naammassaaq. Atortulersuutit nutaat periarfissiigaluttuinnarput, Outi Tervo oqarpoq.